كەزدەسۋ بارىسىندا مەملەكەت باسشىسىنا ەلوردادا دۇنيەجۇزىلىك ساۋدا ورتالىعىنىڭ عيماراتىن سالۋ جونىندەگى جوبا ۇسىنىلدى. بۇل نىسان تولىقتاي شەتەل ينۆەستيتسياسى ەسەبىنەن بوي كوتەرەدى.

نۇرسۇلتان نازارباەۆ بۇگىنگى كەزدەسۋدىڭ بىلتىر قازان ايىندا بريۋسسەلدە وتكەن قازاقستان-ەۋروپا بيزنەس فورۋمى الاڭىنداعى كەلىسسوزدەردىڭ جالعاسى ەكەنىن اتاپ ءوتتى.

«ءبىز بريۋسسەلدە سىزدەردىڭ ۇسىنىستارىڭىزدى تالقىلاپ، تاعى دا كەزدەسۋ وتكىزۋ جونىندە ۋاعدالاسقان ەدىك. حالىقارالىق ساۋدا ورتالىقتارى قاۋىمداستىعىنىڭ مۇنداي جوبالاردى جۇزەگە اسىرۋ ىسىندەگى مول تاجىريبەسىن ەسكەرسەك، ءبىزدىڭ ىنتىماقتاستىعىمىز ەكى تاراپ ءۇشىن دە جەمىستى بولادى دەپ ويلايمىن. بۇل جوبا ەلوردامىزدىڭ كەلبەتى مەن رۋحىنا ساي كەلىپ، ونىڭ اجارىن اشا تۇسكەنىن قالار ەدىم»، — دەدى قازاقستان پرەزيدەنتى.

ەلباسى استانانىڭ بوي كوتەرۋ ۇدەرىسىنە ەرەكشە توقتالىپ، ونداعى ءار ساۋلەت نىسانىنىڭ تاريحى جونىندە ايتتى.

نۇرسۇلتان نازارباەۆ استانانىڭ بۇكىل ەۋرازيا قۇرلىعىنىڭ كىندىگى رەتىندە باتىس پەن شىعىس مادەنيەتتەرىنىڭ ساۋلەت ءستيلىن جانە سالت-ءداستۇرىن بويىنا سىڭىرگەنىن اتاپ ءوتتى.

سونىمەن قاتار، قازاقستان پرەزيدەنتى حالىقارالىق «ەكسپو-2017» مامانداندىرىلعان كورمەسىنىڭ پاۆيلوندارىن سالۋ بارىسى مەن ناتيجەلەرى جونىندە ايتتى.

«ءبىز حالىقارالىق "ەكسپو-2017" كورمەسىن وتكىزۋ قۇقىعىنا يە بولعاندا بايقاۋ جاريالاعان بولاتىنبىز. ديامەترى 80 مەترلىك "نۇر الەم" سفەراسى الەمدەگى بىرەگەي نىسان سانالادى. ونىڭ قۇرىلىسىن ءوزىم باقىلاپ وتىردىم. بۇگىندە "ەكسپو-2017" كورمەسى ينفراقۇرىلىمىنىڭ بازاسىندا "استانا" حالىقارالىق قارجى ورتالىعىن، "جاسىل" تەحنولوگيالاردىڭ حالىقارالىق ورتالىعىن، اT-ستارتاپتاردىڭ حالىقارالىق تەحنوپاركىن اشتىق. سونداي-اق، مۇندا حالىقارالىق ات-ۋنيۆەرسيتەت قۇرىلادى. بارلىق جوبالار سينەرگياسىنىڭ مۋلتيپليكاتيۆتىك تۇرعىدان وڭ اسەرى بولادى دەپ ويلايمىن»، — دەدى نۇرسۇلتان نازارباەۆ.

حالىقارالىق ساۋدا ورتالىقتارى قاۋىمداستىعىنىڭ باسقارما مۇشەسى رولف درااك كەزدەسۋگە جانە ەلوردادا جاڭا نىسان سالۋ جونىندەگى جوبانى تالقىلاۋعا مۇمكىندىك بەرگەنى ءۇشىن مەملەكەت باسشىسىنا العىس ءبىلدىردى.

Nest Investments HOLDINGS كومپانياسىنىڭ كورپوراتيۆتىك ينۆەستيتسيالار جونىندەگى ديرەكتورى مەحران ەفتەحار ءوز كومپانياسى ءۇشىن ساۋدا-ەكونوميكالىق بايلانىستاردى كەڭەيتۋ ۇدەرىسىندەگى استانانىڭ ستراتەگيالىق تۇرعىدان ماڭىزدىلىعىن اتاپ ءوتتى.

«ءبىزدىڭ ينۆەستيتسيالىق توبىمىزعا قاراستى ءىرى 18 دۇنيەجۇزىلىك ساۋدا ورتالىعى بار. مۇنداي نىسانداردى قالاي سالىپ، قالاي باسقارۋدى بىلەمىز. ء"بىر بەلدەۋ، ءبىر جول" اۋقىمدى جوباسىنا قاتىسۋ جونىندەگى ءبىزدىڭ ستراتەگيالىق باعىتىمىزدا قازاقستان، سونىڭ ىشىندە استانا ماڭىزدى ورىن الادى»، — دەدى م. ەفتەحار.

سوڭىندا مەملەكەت باسشىسى دۇنيەجۇزىلىك ساۋدا ورتالىعىنىڭ جاڭا عيماراتىنىڭ جوباسىن ماقۇلداپ، استانا قالاسىنىڭ اكىمى ب. سۇلتانوۆقا ونى ىسكە اسىرۋ جونىندەگى بىرلەسكەن جۇمىستاردى باستاۋعا تاپسىرما بەردى.

Abai.kz