وتكەن جىلى مەديتسينالىق ساقتاندىرۋ قورىنا الماتى قالاسىنان 21 ملرد تەڭگەگە جۋىق جارنا ءتۇستى. ال، جۇيە ىسكە قوسىلعان 2017 جىلدىڭ 1 شىلدەسىنەن بەرى وڭتۇستىك استانالىقتار قورعا 28 ملرد تەڭگەدەن استام قارجى اۋدارعان. بۇل تۋرالى «الەۋمەتتىك مەديتسينالىق ساقتاندىرۋ قورى» كەاق الماتى فيليالى باسشىسى تىلەۋحان ابىلداەۆ حابارلادى.

ايتۋىنشا، بۇل رەسپۋبليكا بويىنشا تۇسكەن جارنانىڭ 21 پايىزى. جالپى، الماتى قالاسى تولەنگەن جارنا كولەمى جاعىنان ەلىمىز بويىنشا كوش باستاپ تۇر، دەدى تىلەۋحان ابىلداەۆ.

ەستەرىڭىزگە سالا كەتسەك، 2019 جىلى جارنانى جۇمىس بەرۋشىلەر عانا تولەيدى. بيىل ولار جۇمىسكەر تابىسىنىڭ 1,5 پايىزى كولەمىندە جارنا اۋدارادى. اۋدارىم جۇمىس بەرۋشىنىڭ ءوز قاراجاتى ەسەبىنەن جاسالادى. ال، جەكە كاسىپكەرلەر 2019 جىلى ءوزى ءۇشىن جارنا اۋدارۋ مىندەتىنەن بوساتىلعان.

سوڭعى وزگەرىستەرگە سايكەس، ەلىمىزدە بيىلدان باستاپ بىرىڭعاي جيىنتىق تولەم جۇيەسى ەنگىزىلدى. بىرىڭعاي تولەمگە وزگە الەۋمەتتىك تولەمدەردەن باسقا ءمامس جارناسى دا ەنگىزىلگەن. ول جيىنتىق تولەمدى تولەۋشىلەرگە ساقتاندىرۋ جۇيەسىنە قاتىسىپ، ءمامس شەڭبەرىندە كورسەتىلەتىن مەديتسينالىق قىزمەتتەردى پايدالانۋعا مۇمكىندىك بەرمەك. تولەمدى جەكە تۇلعالارعا قىزمەت كورسەتەتىن، جالدامالى جۇمىسشىلار ەڭبەگىن پايدالانباي تابىس تاباتىن جەكە تۇلعالار اۋدارادى. جيىنتىق تولەم سوماسى رەسپۋبليكالىق ماڭىزى بار قالا تۇرعىندارى ءۇشىن – 1 اەك (ايلىق ەسەپتىك كورسەتكىش), اۋىل-اۋدان تۇرعىندارى ءۇشىن – 0,5 اەك قۇراماق (2019 جىلى 1 اەك – 2525 تەڭگەگە تەڭ).

ەستەرىڭىزگە سالا كەتسەك، جيناقتالعان قارجى ۇلتتىق بانكتە ساقتالادى. بولاشاقتا ءمامس پاكەتى شەڭبەرىندەگى قىزمەتتەر اقىسىن تولەۋگە جۇمسالادى. ەلىمىزدىڭ باس بانكىمەن قارجىنى سەنىمگەرلىك باسقارۋ تۋرالى كەلىسىم بەكىتىلگەن.

Abai.kz