"قىرعىزستان پرەزيدەنتىنىڭ قىزمەتىنە كەپىلدىك بەرۋ تۋرالى" زاڭعا ءتيىستى وزگەرىستەر ەنگىزۋدى پارلامەنت دەپۋتاتتارى يسحاك ماساليەۆ پەن كۋرمانكۋل زۋلۋشەۆ ۇسىنعان.

جوبا بويىنشا، پرەزيدەنتكە يمپيچمەنت جاريالانىپ، قىزمەتىنەن كەتكەن سوڭ قىلمىستىق جاۋاپقا تارتىلۋى مۇمكىن. ءىس باسىنداعى پرەزيدەنتتى جوگوركۋ كەڭەش وعان باس پروكۋراتۋرانىڭ قىزمەتىندە قىلمىس بەلگىلەرى بار دەگەن تۇجىرىمى بويىنشا ايىپ تاققان جاعدايدا عانا جاۋاپقا تارتۋ قاراستىرىلعان.

زاڭ جوباسىندا سونىمەن قاتار ەكس-پرەزيدەنتتىڭ ار-نامىسى مەن قادىر-قاسيەتىن قورعاۋعا كەپىلدىك بەرەتىن 18-باپتى وزگەرتۋ دە ۇسىنىلعان.

زاڭ ءبىرجولا ماقۇلدانسا، المازبەك اتامباەۆتىڭ جاۋاپقا تارتىلۋى مۇمكىن.

بيىل قاراشانىڭ 27-سىندە قىرعىزستان پارلامەنتىنىڭ زاڭ ىستەرى كوميتەتى بۇرىنعى پرەزيدەنتتەردى تيىسپەۋشىلىك قۇقىعىنان ايىرۋ تۋرالى زاڭ جوباسىن بەكىتىپ، تالقىلاۋعا جونەلتكەن.

بۇل شەشىم سوتسيال-دەموكراتيالىق پارتيانى باسقاراتىن قىرعىزستاننىڭ ەكس-پرەزيدەنتى المازبەك اتامباەۆ پەن ونىڭ ورنىن باسقان قازىرگى پرەزيدەنت سوورونباي جەەنبەكوۆتىڭ اراسى ۋشىعىپ كەتكەندە قابىلداندى.

سوڭعى ايلاردا كەيبىر قىرعىزستاندىق ساياساتكەر مەن دەپۋتات اتامباەۆتىڭ پرەزيدەنت كەزىندە قابىلداعان شەشىمدەرىن تەكسەرۋگە شاقىرعان. بيىل ونىڭ بىرنەشە جاقتاسى جەمقورلىق بابى بويىنشا كۇدىككە ءىلىنىپ، قاماۋعا الىنعان.

2017 جىلعى قازان ايىندا اتامباەۆ قول استىندا پرەمەر-مينيستر بولعان جەەنبەكوۆتىڭ كانديداتۋراسىن بارىنشا قولداپ، قازاقستان بيلىگىن "قارسىلاس كانديداتتى اشىق جاقتادى، قىرعىزستاننىڭ ىشكى ىسىنە قول سۇقتى" دەپ ايىپتاعان.

بىراق سوڭعى بىرنەشە اي ىشىندە ەكى ساياساتكەر ءبىر-ءبىرىن "بىلىكسىزدىك تانىتتى" دەپ ايىپتاپ، سوزگە كەلىپ قالعان.

Abai.kz