قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا «دارىن» مەملەكەتتىك جاستار سىيلىعىن تاپسىرۋ راسىمىنە قاتىستى، دەپ حابارلايدى اقوردانىڭ رەسمي سايتى.

مەملەكەتتىك حاتشى قازاقستان پرەزيدەنتى نۇرسۇلتان نازارباەۆتىڭ «كەز كەلگەن ەل ءوزىنىڭ كەلەشەگىن وسكەلەڭ ۇرپاعىمەن بايلانىستىرادى» دەگەن سوزىنە توقتالدى. ەلباسى جاستارعا ءاردايىم قولداۋ كورسەتە وتىرىپ، مەملەكەتتىك جاستار ساياساتىن دامىتۋ ءىسىن ەلىمىزدىڭ نەگىزگى باسىمدىقتارىنىڭ ءبىرى رەتىندە بەلگىلەپ بەردى. مەملەكەت باسشىسىنىڭ جارلىعىمەن 2019 جىل جاستار جىلى بولىپ جاريالاندى.

– بۇل وزىق دامىعان 30 ەلدىڭ قاتارىنا قوسىلۋ جونىندەگى «قازاقستان-2050» ستراتەگياسىنىڭ باستى ماقساتىنا قول جەتكىزۋدە جاستاردىڭ ماڭىزدى ءرول اتقاراتىنىن كورسەتەدى، – دەدى گ.ابدىقالىقوۆا.

«دارىن» مەملەكەتتىك جاستار سىيلىعى 1992 جىلدان بەرى ءتۇرلى سالاداعى ادەبيەت، عىلىم، ديزاين جانە بەينەلەۋ ونەرى، جۋرناليستيكا، كلاسسيكالىق مۋزىكا، قوعامدىق قىزمەت، سپورت، تەاتر جانە كينو، ەسترادا، حالىق شىعارماشىلىعى سياقتى 10 نوميناتسيا بويىنشا بەرىلىپ كەلەدى. وعان 200-دەن اسا تالانتتى جاستارىمىز يە بولدى. بۇل سىيلىق ءار جىلدارى امانجول التاەۆ، دارمەن سادۋاقاسوۆ، ماكسيم زدوروۆەتس، ماريا مۋدرياك، دەنيس تەن، ءادىل احمەتوۆ سياقتى بەلگىلى تۇلعالارعا، «ۇلىتاۋ» شىعارماشىلىق ۇجىمىنا جانە باسقالارعا بەرىلدى.

2018 جىلى 20 جەڭىمپازعا «دارىن» مەملەكەتتىك جاستار سىيلىعى لاۋرەاتى» اتاعى بەرىلىپ، ديپلوم، توسبەلگى جانە ءار نوميناتسيا بويىنشا 600 000 تەڭگە اقشالاي سىياقى تاپسىرىلدى.

لاۋرەاتتار اراسىندا «كوك تۋدىڭ جەلبىرەگەنى» دەگەن تاقىرىپپەن وتكەن رەسپۋبليكالىق جاس اقىندار ايتىسىنىڭ جەڭىمپازى ءبىرجان بايتۋوۆ، ەلىمىزدىڭ ۇزدىك جاس فلەيتاشىلارىنىڭ ءبىرى روزا سولتىحانوۆا، بوكستان الەم چەمپيونى قايرات ەراليەۆ، «ارۋ-تاس» جشس ديرەكتورى بەكجان الىمقۇلوۆ، بيوتەحنيكا ۇلتتىق ورتالىعىنىڭ گەنەتيكا جانە بيوحيميا ميكرودەنەلەرى زەرتحاناسىنىڭ عىلىمي قىزمەتكەرى جىگەر اقىشەۆ جانە باسقا دا ازاماتتار بار.

ءراسىم سوڭىندا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا لاۋرەاتتاردىڭ بارىنە دەنساۋلىق، باق-بەرەكە جانە ەل يگىلىگى جولىنداعى جۇمىستارىنا تابىس تىلەدى.

Abai.kz