قازاقستاندىق اۆتوونەركاسىپ سالاسىنا ءىرى ينۆەستور كەلدى
2018 جىلى 11 جەلتوقساندا استانادا ءبىرىنشى ۆيتسە-پرەمەر اسقار مامين اسا ءىرى قازاقستاندىق ءاۆتووندىرۋشى «سارىارقااۆتوونەركاسىپ» جشس-ءنىڭ Genertec قۇرامىنا كىرەتىن اۆتوموبيلدەر يمپورتى جانە ەكسپورتى بويىنشا قىتايدىڭ سمس (China National Machinery IMP. & EXP. CORP) ترانسۇلتتىق مەملەكەتتىك كومپانياسىنىڭ كاپيتالىنا كىرۋى تۋرالى (اكتسيالاردىڭ 51%) كەلىسسوزدەر جۇرگىزىپ، ينۆەستيتسيالىق كەلىسىمگە قول قويىلۋىنا قاتىستى. بۇل تۋرالى پرەمەر-ءمينيستردىڭ رەسمي سايتى جازدى.
اسقار مامين مۇنىڭ وتاندىق اۆتوموبيل جاساۋ سالاسى ءۇشىن ستراتەگيالىق جوبا ەكەنىن اتاپ ءوتتى، بۇل سالانىڭ دامۋ قارقىنى ارتىپ، سىرتقى نارىقتارعا شىعۋ ءۇشىن ەكسپورتتىق الەۋەتى ۇلعاياتىن بولادى. جوبا «جىبەك جولىنىڭ ەكونوميكالىق بەلدەۋى» باعدارلاماسىنىڭ ماڭىزدى بولىگى بولىپ تابىلادى جانە يندۋستريالاندىرۋ مەن ينۆەستيتسيالارداعى قازاقستان-قىتاي ىنتىماقتاستىعىنىڭ تىزىمىنە ەنەدى.
Genertec (China General Technology Group) — قىتايدىڭ مەملەكەتتىك كونگلومەراتى، ماشيناجاساۋ، فارماتسەۆتيكا، ينجەنەرلىك مەردىگەرلىك، قۇرىلىس جانە جىلجىمايتىن مۇلىك، سونداي-اق تەحنيكالىق كونسالتينگ سالالارىن قامتيدى. كومپانيانىڭ جىلدىق اينالىمى — $31 ملرد. ەكسپورتتىق ينۆەستيتسيالىق قورجىنى — $180 ملرد.
سمس (China National Machinery IMP. & EXP. CORP.) — ءىرى حالىقارالىق جوبالاۋشى، جوبالاردى باسقارۋدا قىزمەت كورسەتۋ بويىنشا مەردىگەر جانە اۆتوموبيل سالاسىندا كورسەتىلەتىن قىزمەتتەردى جەتكىزۋشى. Genertec قۇرامىنا كىرەدى.
بىرلەسكەن كاسىپورىندى دامىتۋ اياسىندا سەرىكتەستەر سالاداعى ءوندىرىس كولەمىن 100 000 دانا اۆتوموبيلگە جانە جەرگىلىكتەندىرۋ دەڭگەيىن 50%-عا دەيىن جەتكىزۋدى كوزدەپ وتىر. قوستاناي قالاسىندا اۆتوموبيل قۇراستىرۋ ءوندىرىسىن دامىتۋ اۆتوموبيل وندىرىسىندە جاڭا جۇمىس ورىندارىن قۇرۋعا مۇمكىندىك بەرەدى.
Genertec باسقارما توراعاسى لۋ يمين كەلىسسوزدەر بارىسىندا بىرلەسكەن جوبا اياسىندا ءوندىرىستى جەرگىلىكتەندىرۋ بارىنشا ۇلعايتىلىپ، برەندتەر قورجىنى ارتتىرىلىپ، جاڭا تەحنولوگيالار ەنگىزىلەتىنىن ايتتى.
قازاقستان مەن ەاەو اۋماعىنا قۇراستىرۋ بولىكتەرىن جەتكىزۋشىلەر تاڭدالىپ الىنادى، تۇتىنۋشىلارعا اۆتوموبيلدەرگە ساپالى سەرۆيستىك قىزمەت كورسەتۋدى قامتاماسىز ەتۋ بويىنشا جۇمىستار جالعاستىرىلادى.
بىرلەسكەن كاسىپورىنعا سالىنعان ينۆەستيتسيالاردىڭ جالپى سوماسى شامامەن $1,1 ملرد بولماق.
قىتايلىق سەرىكتەسپەن جانە ينۆەستورمەن بىرلەسىپ، 2019–2021 جج. ءوندىرىستى دامىتۋ ستراتەگياسى اياسىندا JAC, ANKAI, HOWO, HANTENG برەندىندەگى اتۆوموبيلدەرى شىعارۋ جوسپارلانىپ وتىر.
قول قويۋ راسىمىنە سونداي-اق قر-داعى قحر ەلشىسى چجان سياو، ينۆەستيتسيالار جانە دامۋ ءمينيسترى جەڭىس قاسىمبەك، «بايتەرەك» حولدينگىنىڭ باسقارما توراعاسى ايدار ءارىپحانوۆ، قازاقستان دامۋ بانكىنىڭ باسقارما توراعاسى بولات جامىشەۆ، Bank of China International پرەزيدەنتى سۋن تسزينشان قاتىستى.
Abai.kz
