مىندەتتى الەۋمەتتىك مەديتسينالىق ساقتاندىرۋ - حالىقتىڭ دەنساۋلىعىن ساقتاۋ سالاسىنداعى مۇددەلەردى الەۋمەتتىك قورعاۋدىڭ مەملەكەتتىك جۇيەسى. وتكەن جىلى وسى باعدارلاما ەنگىزىلگەن سوڭ دەنساۋلىق ساقتاۋ جۇيەسى باسەكە جاعدايىنداعى جۇمىسقا تۇبەگەيلى اۋىستى. مىندەتتى الەۋمەتتىك مەديتسينالىق ساقتاندىرۋ قازاقستاننىڭ بارلىق ساقتاندىرىلعان ازاماتتارىنا جىنىسىنا، جاسىنا، الەۋمەتتىك مارتەبەسىنە، تۇرعىلىقتى جەرىنە جانە تابىستارىنا قاراماستان مەديتسينالىق جانە ءدارى-دارمەكتىك كومەكتە تەڭ قول جەتىمدىلىككە كەپىلدىك بەرەدى.

استانالىق الەۋمەتتىك مەديتسينالىق ساقتاندىرۋ قورى تىركەۋ ناۋقانى اياسىندا ەمحانالارعا تىركەلگەن تۇرعىنداردىڭ الدىن الا مونيتورينگىن جاسادى.

تىركەلگەن تۇرعىندار سانى بويىنشا «سالاۋاتتى استانا»، «شيپاگەر» وتباسىلىق دەنساۋلىق ورتالىعى» جەكەمەنشىك ەمدەۋ مەكەمەلەرى مەن قالالىق № 9, № 2 ەمحانالارى كوش باستاپ تۇر. ناۋقان باستالعالى 18 761 ازامات باستاپقى مەديتسينالىق-سانيتارلىق كومەك ۇيىمى مەن ماماندى تاڭداۋدا ەركىن تاڭداۋ قۇقىعىن پايدالاندى، ناۋقان اياسىندا 1233 ادام تىركەلدى، بۇل ازاماتتار - تۇراقتى نەمەسە ۋاقىتشا مەكەن-جايى، جۇمىسى نەمەسە وقۋ ورنىنىڭ وزگەرۋىنە بايلانىستى ەمحانالارىن اۋىستىرعان تۇلعالار.

قور فيليالىنىڭ دي⁠رەكتورى ن. قابدىقاپاروۆتىڭ ايتۋىنشا، ناۋقان شەڭبەرىندە ەمحانالارعا تىركەلگەن ازاماتتارعا 2019 جىلدىڭ 1 قاڭتارىنان باستاپ قىزمەت كورسەتىلەدى. جاڭا ەمحاناعا تىركەلگەن كەزدە بىرىڭعاي جۇيە ازاماتتى بۇرىنعى ەمحاناسىنداعى تىركەۋدەن اۆتوماتتى تۇردە شىعارادى. بۇل رەتتە ەمحانالارعا تىركەلۋ پروتسەسى تۇرعىندار ءۇشىن كۇننەن-كۇنگە قولجەتىمدى بولا تۇسكەندىگىن ايتا كەتكەن ءجون. ەندى اتا-انالار ءۇشىن ەلەكتروندى ۇكىمەت پورتالى مەن Telegram-بوت egov.kz. ارقىلى ءوز بالالارىن تىركەۋ مۇمكىندىگى پايدا بولدى.

«پورتال ارقىلى قىزمەت الۋ ءۇشىن egov.kz-تە تىركەلۋ جانە ەلەكتروندى تسيفرلىق قولتاڭبانىڭ بولۋى جەتكىلىكتى. بۇل جەردە اتالعان قىزمەت ءتۇرى بويىنشا 2007 جىلدان بەرگى تۋعان بالالاردى تىركەۋگە بولاتىندىعىن ايتا كەتۋ كەرەك» - دەپ ن. قابدىقاپاروۆ ەسكەرتىپ ءوتتى.

ەgov.kz پورتالىنىڭ «باستاپقى مەديتسينالىق-سانيتارلىق كومەك كورسەتەتىن مەديتسينالىق ۇيىمعا تىركەلۋ» بولىمىندە بالاعا قىزمەت كورسەتۋ كومانداسىن تاڭداپ، ونىڭ جەكە سايكەستەندىرۋ ءنومىرىن (جسن) ەنگىزۋ قاجەت. تۋىستىق بايلانىستى تەكسەرۋ ءۇشىن سۇراۋ سالۋ احاج-عا باعىتتالادى. مالىمەت راستالعاننان كەيىن تىزىمنەن باستاپقى مەديتسينالىق-سانيتارلىق كومەك ۇيىمىن (بمسكۇ) تاڭداپ، سۇرانىمدى تولتىرۋعا بولادى. وڭدەلگەن سۇرانىم ءسىزدىڭ جەكە كابينەتىڭىزگە جىبەرىلەدى.

ەگەر ءسىزدىڭ ۇيالى تەلەفونىڭىزدا Telegram مەسسەندجەرى ورناتىلعان بولسا، اتالعان قىزمەتتى https://t.me/EgovKzBo سىلتەمەسىمەن Telegram-بوت ارقىلى الۋعا بولادى. ول ءۇشىن تەلەفون ءنومىرىڭىز ەلەكتروندى پورتالدىڭ پروفيلىنە بەكىتىلۋى ءتيىس. ەلەكتروندى تسيفرلى قولتاڭبانىڭ بولۋى مىندەتتى. تىركەۋ كەزەڭدەرىنىڭ بارلىعىنان وتكەننەن كەيىن، تىركەلۋگە ونلاين-سۇرانىم تولتىرىلادى. استانا قالاسى بويىنشا باستاپقى مەديتسينالىق-سانيتارلىق كومەك كورسەتەتىن مەديتسينالىق ۇيىمداردىڭ ءتىزىمى  الەۋمەتتىك مەديتسينالىق ساقتاندىرۋ قورىنىڭ fms.kz سايتىنداعى «كلينيكانى تاڭداۋ» بولىمىندە ورنالاستىرىلعان. سۇرانىمدى راسىمدەۋ كەزىندە قانداي دا ءبىر كەدەرگىلەر تۋىنداعان جاعدايدا، 1414 بىرىڭعاي بايلانىس ورتالىعىنا حابارلاسۋعا بولادى.

تىركەۋ ناۋقانى 2018 جىلدىڭ 15 قاراشاسىنا دەيىن جالعاسادى. ەرەجەگە ساي ەمحاناعا جىلىنا ءبىر رەت تىركەلۋگە بولادى. بىراق بۇل ۋاقىتشا نەمەسە تۇراقتى تىركەۋىن قايتا راسىمدەگەن نەمەسە قالانىڭ باسقا اۋدانىنا كوشىپ كەلگەن ازاماتتارعا قاتىستى ەمەس.

Abai.kz