ەلباسى نۇرسۇلتان نازارباەۆ جاڭادان قۇرىلعان تۇركىستان وبلىسىنا ەرەكشە نازار اۋدارىپ وتىرعانى بەلگىلى. وڭىردەگى ءار سالانى دامىتۋعا ناقتى تاپسىرمالار دا بەرگەن بولاتىن. ەلباسىنىڭ سول تاپسىرمالارىنا سايكەس، وڭىردە ءار سالا بويىنشا قارقىندى جۇمىستار اتقارىلىپ جاتىر.

«كونە تۇركىستان  – جاڭا مۇمكىندىكتەر» اتتى حالىقارالىق ينۆەستيتسيالىق جəنە تۋريستىك فورۋم اياسىندا قۇنى 1,7 ملرد. اقش دوللاردى قۇرايتىن 19 مەموراندۋمعا قول قويىلدى. اتاپ ايتقاندا، تۇركىستان وبلىسى اكىمدىگى مەن يران، تۇركيا، چەحيا، رەسەي، ءباا، مالايزيا، يتاليا، پولشا، قىتاي مەملەكەتتەرىنىڭ ينۆەستورلارى اراسىندا كەلىسىمدەر جاسالدى.

تۇركىستان وبلىسىنىڭ اكىمى جانسەيىت تۇيمەباەۆ يراننىڭ «Ardabil Petrochemical Co» كومپانياسىمەن جالپى قۇنى 205 ملن. دوللاردى قۇرايتىن ونكولوگيالىق ورتالىق پەن مۇناي وڭدەۋ زاۋىتىن سالۋ جونىندە مەموراندۋمعا قول قويعانى ەرەكشە ايتا كەتكەن ءجون.

سونىمەن قاتار،  بۇدان وزگە قىتايلىق «Changchun Longyuan Power Equipment Co. LTD» كومپانياسىمەن ەنەرگەتيكالىق قۇرىلعىلار مەن بۇيىمدار جاساۋ جونىندە قۇنى 648 ملن. اقش دوللارى كولەمىندەگى ۋاعدالاستىققا قول جەتكىزىلدى.

ال رەسەيدىڭ «Green Land Alatau»  جاۋاپكەرشىلىگى شەكتەۋلى سەرىكتەستىگى  180 ملن. اقش دوللارىنا جىلىجاي كەشەنىنىڭ قۇرىلىسىن جۇرگىزەتىن بولدى. فورۋم بارىسىندا تۇزىلگەن مەموراندۋمقا سايكەس، قىتايلىق «Shanghai Lianfu New Energy Science & Technology Group» كومپانياسىمەن 340 ملن. اقش دوللارىنا كۇن ەنەرگياسىمەن جۇرەتىن ەلەكتواۆتوبۋستار شىعاراتىن زاۋىت قۇرىلىسىن سالۋ بويىنشا كەلىسىم ءتۇزىلدى.

Abai.kz