تۇركىستان وبلىسىنىڭ اكىمى جانسەيىت تۇيمەباەۆ ەلىمىزدىڭ كوشباسشى جاستارىمەن بەيرەسمي كەزدەسۋ وتكىزدى. باسقوسۋدا تۇركىستان وڭىرىندەگى جاستاردىڭ جەتكەن جەتىستىكتەرى مەن شەشۋدى قاجەت ەتەتىن تۇيىتكىلدەر اڭگىمە ارقاۋىنا اينالدى.

جيىن بارىسىندا ايماق باسشىسى جالىندى جاستاردى تۇركى الەمىنىڭ رۋحاني استاناسى اتانعان ءوڭىردىڭ وركەندەۋىنە ۇلەس قوسۋعا شاقىردى.

«ەلباسى نۇرسۇلتان نازارباەۆ حالىققا ارناعان جولداۋىندا 2019 جىلدى «جاستار جىلى» دەپ جاريالادى. مۇنى وبلىس حالقىنىڭ جاستارى ەرەكشە ىقىلاسپەن قابىلدادى. قازىرگى تاڭدا جاستار جىلىن وتكىزۋ جونىندەگى ەل ۇكىمەتى جول كارتاسىن ازىرلەۋدە. بۇل جوباعا تۇركىستان قالاسىندا وتەتىن ءىرى كولەمدى حالىقارالىق ءىس-شارالار ەنگىزىلۋدە. ماسەلەن، كەلەر جىلى ورتا ازيا ەلدەرى جاستارىنىڭ فورۋمى، تۇركى تىلدەس مەملەكەتتەردىڭ جاستارىنىڭ كونگرەسى ۇيىمداستىرىلماق. سونداي-اق، وبلىستاعى ءار اۋداننىڭ بەلسەندى جاستارى اي سايىن «تۇركىستانعا تارتۋ» اتتى شىعارماشىلىق شارالار وتكىزىلمەك. بارشاڭىزدى وسى سىندى يگىلىكتى ءىستىڭ قاسىندا بولىپ، تۇركىستانىمىزدى دامىتۋعا شاقىرامىن»، – دەدى جانسەيىت قانسەيىتۇلى.

جاستار جاعى تۇركىستان وڭىرىندە وسكەلەڭ ۇرپاقتىڭ جان-جاقتى دامۋىنا جاعداي جاسالىپ جاتقانى كوڭىل قۋانتاتىنىن جەتكىزدى. ءوز كەزەگىندە «قازاقستاننىڭ 100 جاڭا ەسىمى» جوباسىنىڭ جەڭىمپازى، دۇنيەجۇزىلىك توعىز قۇمالاق فەدەراتسياسى سپورتشىلارىنىڭ جەتەكشىسى، توعىز قۇمالاقتان الەمنىڭ 7 دۇركىن چەمپيونى اسەل داليەۆا، ءوزى جەتكەن جەتىستىكتەرىن وڭىرىمىزدەگى جاستارعا كورسەتىلگەن قولداۋمەن بايلانىستىرادى.

«قازىرگى تاڭدا ءوڭىرىمىزدىڭ جاستارى ءتۇرلى سالالارداعى بايقاۋلار مەن سايىستاردا بيىك بەلەستەردى باعىندىرىپ ءجۇر. بۇل رەتتە، جاستارعا جاسالىپ جاتقان قولداۋدىڭ ماڭىزى وراسان زور. بۇگىندە جاتىقتىرۋشىنىڭ دا قىزمەتىن قوسا اتقارۋدامىن. مۇنىڭ بارلىعى ءسىزدىڭ بىزدەرگە دەگەن سەنىمىڭىز، جاس سپورتشىلاردىڭ بويىنا ارتىلعان ۇلكەن ءۇمىت. وبلىس ورتالىعىنىڭ تۇركىستان قالاسىنا اۋىسۋى توعىز قۇمالاق سپورت ءتۇرىنىڭ ودان ارى جاندانۋىنا مۇمكىندىك بەرەتىنىن ايتقىم كەلەدى. ياعني، جاڭا عيماراتتار مەن سپورت الاڭشالارىنىڭ سالىنۋى جاس سپورتشىلاردىڭ جاڭا قىرىنان كورىنۋىنە ەسىك اشاتىنى ءسوزسىز. وسى مۇمكىندىكتەردى پايدالانىپ وبلىسىمىزدىڭ تەك الدىڭعى قاتاردان كورىنۋىنە ۇلەس قوساتىنىمىزعا سەنىم بىلدىرگىم كەلەدى»، – دەدى اسەل ەگىزبايقىزى.

ايتا كەتەيىك، 3 كۇنگە جالعاساتىن فورۋم «تەرەڭ تاريحتان – جارقىن بولاشاققا!» اتتى رەسپۋبليكالىق پىكىر-سايىس تۋرنيرىمەن باستاۋ الدى. سالتاناتتى جيىنعا وبلىس اكىمى ج.تۇيمەباەۆ ارنايى قاتىسىپ، قاتىسۋشىلارعا ساتتىلىك تىلەدى. دەبات ويىنىندا قاتىسۋشىلار ەلدەگى جاستار ساياساتى مەن تۇركى الەمىنىڭ رۋحاني استاناسى اتانعان تۇركىستان قالاسىن دامىتۋعا بايلانىستى كەلەلى ماسەلەلەرىن ورتاعا سالدى. سايىسقا رەسپۋبليكانىڭ بارلىق ايماقتارىنان 2 ادامنان قۇرىلعان 75 كوماندا قاتىستى.

سونداي-اق، فورۋم قاتىسۋشىلارى تۇركىستان قالاسىنداعى «قوجا احمەت ياساۋي» كەسەنەسى، ساۋران قالاشىعى جانە وتىرار اۋدانىنداعى «ارىستان باب» كەسەنەسى، «رۋحانيات ءابۋ-ناسىر ءال-فارابي» مۇراجايى، «كونە وتىرار توبە» قالاشىعىن ارالاپ، تاريحىمەن تانىستى. سونداي-اق، فورۋم اياسىندا جاستارعا ارنالعان «IntellectGAME» زياتكەرلىك ويىندارى جانە حالىقارالىق «جايدارمان» سايىسى وتەدى. وعان قىرعىستان، وزبەكستان، باشقۇرستان، تاتارستان، تۇركىمەنستان، تۇركيا رەسپۋبليكالارىنىڭ قۇراما كوماندالارى جانە ەلىمىزدىڭ ازىلكەشتەرى قاتىسادى دەپ كۇتىلۋدە.

Abai.kz