2018-2019 وقۋ جىلىنىڭ 3 توقسانىنان باستاپ 5 جانە 7 سىنىپ وقۋشىلارىنا جاڭا كۋرس ەنگىزىلەدى. بۇل تۋرالى بۇگىن قر پارلامەنتى سەناتىنداعى ۇكىمەت ساعاتىندا ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا ايتتى، دەپ حابارلايدى اباي-اقپارات قازاقپاراتقا سىلتەمە جاساپ.

«ورتا ءبىلىم بەرۋدى جاڭارتىلعان مازمۇنعا كوشىرۋ جۇمىستارى بەكىتىلگەن كەستە بويىنشا جالعاسۋدا. بيىلعى وقۋ جىلىنان باستاپ  3, 6, 8 سىنىپتار وسى  باعدارلامامەن وقي باستادى. 4, 9, 10  سىنىپتاردا اپروباتسيادان وتكىزىلۋدە. وقۋلىقتاردىڭ ساپاسى مەن مازمۇنىن جاقسارتۋ ءۇشىن ءبىراز جۇمىس جاسالدى. اتاپ ايتساق، وقۋلىقتاردىڭ ەلەكتروندى نۇسقالارى ەنگىزىلدى. پاندىك جانە رەسپۋبليكالىق كوميسسيالاردىڭ قۇرامى بىلىكتى مۇعالىمدەرمەن، ادىسكەرلەرمەن تولىقتى. وقۋلىقتاردى 4 جىل سايىن قايتا باسىپ شىعارۋ نورماسىن ەرەجەدەن الىپ تاستاۋ نە قالدىرۋ ماسەلەسى قاراستىرىلىپ جاتىر»، - دەدى ول.

ۆيتسە-ءمينيستردىڭ ايتۋىنشا، «رۋحاني جاڭعىرۋ» باعدارلاماسى اياسىندا 5, 7 سىنىپتارعا «ولكەتانۋ» كۋرسى بيىلعى وقۋ جىلىنىڭ ەكىنشى جارتىجىلدىعىنان باستاپ العاش رەت ەنگىزىلمەك.

«وقۋلىعى دايىن. جەرگىلىكتى اتقارۋشى ورگاندار ساتىپ الىپ جاتىر»،- دەدى ەلميرا سۋحانبەرديەۆا. ونىڭ دەرەگىنشە، بيىلدان باستاپ 1, 11 سىنىپتارعا ارنالعان جاڭا تيپتىك وقۋ جوسپارى بەكىتىلگەن.

«ەندى تەك ءبىر عانا ۇلگىدەگى وقۋ جوسپارى بولمايدى. بىرنەشە ۇلگىدەگى وقۋ باعدارلاماسىن دايىنداپ بەكىتتىك. مەكتەپتەر وزدەرىنە جارامدى باعدارلاما بويىنشا جۇمىس جاساۋىنا مۇمكىندىك بەردىك. بارلىق مەكتەپتەردە وسى ۇلگىلىك وقۋ باعدارلاماسى ارقىلى اكادەميالىق دەربەستىك الادى دەپ ەسەپتەيمىز. قاي باعدارلامامەن جۇمىس ىستەيتىنىن وزدەرى شەشەدى»، - دەدى ۆيتسە-مينيستر.

Abai.kz