8-9 قاراشادا قىزىلجاردا قازاقستان جانە رەسەي پرەزيدەنتتەرى كەزدەسەدى. اتالعان كەزدەسۋدىڭ شەڭبەرىندە بىرقاتار ەكىجاقتى كەلىسسوزدەر ۇيىمداستىرىلماق.

اتاپ ايتقاندا، قر مادەنيەت جانە سپورت مينيسترلىگى، تۋريزم جانە يندۋستريا كوميتەتى 8-9 قاراشادا «قازاقستان مەن رەسەي ءتۋريزمىن دامىتۋداعى جاڭا تاسىلدەر مەن ۇردىستەر» اتتى قازاقستان-رەسەي وڭىرارالىق ىنتىماقتاستىعىنىڭ  XV-فورۋمىن وتكىزەدى.

قۇمار اقساقالوۆ تىزگىنىن ۇستاعان سولتۇستىك قازاقستان وبلىسىندا، سونىڭ ىشىندە ەلباسى نۇرسۇلتان نازارباەۆ پەن رەسەي پرەزيدەنتى ۆلاديمير پتۋين جولىعادى دەپ كۇتىلگەن قىزىلجاردا قىزۋ دايىندىق ءجۇرىپ جاتىر.

قىزىلجاردا وتەتىن پرەزيدەنتتەر كەزدەسۋىنە ارنايى جاڭا وقۋشىلار سارايى سالىنعان. جاڭا عيماراتتا 9-قاراشا كۇنى ن.نازارباەۆ پەن ۆ.پۋتين كەزدەسەدى. بۇل جەردە پلەنارلىق وتىرىس وتەدى.

ايتپاقشى، بۇل عيماراتتىڭ قۇنى 3,6 ميلليارد تەڭگە. بيۋدجەتتەن وسىنشا قاراجات بولىنگەن.

ال IT قۇرىلعىلارعا ۇزىن-ىرعاسى 2 ميلليارد تەڭگەگە جۋىق قاراجات جۇمسالعان. بارلىق تەحنيكالار  اقش، گەرمانيا، يتاليا، قىتاي مەن رەسەيدەن الىنعان. بىلايعى كۇندەرى بۇل سارايدا 67 ۇيىرمە جۇمىس جاسايتىن بولسا، كۇن سايىن 300 وقۋشىنى قىبىلداۋعا قاۋقارلى، دەيدى فورۋمدى ۇيىمداستىرۋشىلار.

ايتپاقشى، نۇرسۇلتان نازارباەۆ پەن ۆلاديمير پۋتين قىزىلجاردا كەزدەسىپ، وڭىرارالىق ىنتىماقتاستىق فورۋمىن وتكىزەدى دەگەن اقپارات بۇعان دەيىن 2016 جىلى تاراعان. ءتىپتى، ول كەزدە مەمبيۋدجەتتەن ءتيىستى قاراجات ءبولىنىپ، دايىندىق جۇمىستارى جۇرگىزىلە باستاعان. الايدا، كەزدەسۋ ورنى اۋىسىپ، پرەزيدەنتتەردىڭ باس قوسۋى استانادا وتكەن.

ال وسىعان دەيىنگى وڭىرارالىق ىنىماقتاستىق فورۋمى بىلتىر رەسەيدىڭ چەليابى قالاسىندا وتكەن بولاتىن.

Abai.kz