نۇرسۇلتان نازارباەۆ ەستونيا رەسپۋبليكاسىنىڭ پرەمەر-ءمينيسترى يۋري راتاسپەن كەزدەستى. بۇل تۋرالى اقوردانىڭ ءباسپاسوز قىزمەتى حابارلادى.

كەزدەسۋ بارىسىندا تاراپتار ەكى مەملەكەتتىڭ تسيفرلاندىرۋ جانە يننوۆاتسيالىق تەحنولوگيالار سالاسىنداعى ىنتىماقتاستىعىن نىعايتۋ پەرسپەكتيۆالارىن تالقىلادى، سونداي-اق ساۋدا-ەكونوميكا قارىم-قاتىناستارىن دامىتۋ ماسەلەلەرى جونىندە پىكىر الماستى.

مەملەكەت باسشىسى «استانا حاب» ءىت-ستارتاپتار حالىقارالىق تەحنولوگيالىق پاركىنىڭ اشىلۋ راسىمىنە قاتىسقانى ءۇشىن ەستونيا رەسپۋبليكاسىنىڭ پرەمەر-مينيسترىنە ريزاشىلىق ءبىلدىردى.

قازاقستان پرەزيدەنتى ەستونيانىڭ تسيفرلىق تەحنولوگيالار سالاسىنداعى تاجىريبەسى مول ەكەنىن اتاپ ءوتتى.

نۇرسۇلتان نازارباەۆ ەكى ەل اراسىنداعى ساۋدا بايلانىستارىن نىعايتۋ قاجەتتىگىن ايتىپ، ەكونوميكالىق ىنتىماقتاستىقتى دامىتۋدىڭ باسىم باعىتتارىنا توقتالدى. مەملەكەت باسشىسى ەلىمىزدە ىسكە اسىرىلىپ جاتقان ينفراقۇرىلىمدىق باعدارلامالار مەن سولاردىڭ اياسىندا بوي كوتەرىپ كەلە جاتقان نىساندار جانە كولىك-ترانزيت الەۋەتىن ارتتىرۋ جونىندەگى جوبالاردىڭ ناتيجەلەرى تۋرالى ايتتى.

سونىمەن قاتار، مەملەكەت باسشىسى قايتا وڭدەۋ جانە اگرارلىق ونەركاسىپ، فارماتسەۆتيكا سالالارىندا جانە ەكونوميكانىڭ باسقا دا سەكتورلارىندا ىنتىماقتاستىقتى ءبىر جولعا قويۋدىڭ ماڭىزدى ەكەنىن اتاپ ءوتتى.

ەستونيا رەسپۋبليكاسىنىڭ پرەمەر-ءمينيسترى قوناقجايلىق كورسەتكەنى ءۇشىن قازاقستان پرەزيدەنتىنە العىس ايتىپ، ءوزىنىڭ استاناعا العاشقى ساپارىنان العان اسەرىن ورتاعا سالدى.

– كەشە پرەمەر-مينيستر باقىتجان ساعىنتاەۆپەن سىندارلى كەلىسسوز جۇرگىزدىك. مەن قازاقستانعا العاش رەت كەلىپ وتىرمىن. استانانىڭ ينفراقۇرىلىمدىق نىساندارىنا قاراپ، ەلدەرىڭىزدىڭ قالاي دامىپ كەلە جاتقانىن كورۋگە بولادى، – دەدى يۋ.راتاس.

ەستونيا رەسپۋبليكاسىنىڭ پرەمەر-ءمينيسترى تسيفرلاندىرۋ جانە كولىك-لوگيستيكا سالالارىندا بىرلەسكەن جوبالاردى ىسكە اسىرۋعا، سونداي-اق ينۆەستيتسيالىق ىنتىماقتاستىقتى كەڭەيتۋگە مۇددەلىلىك تانىتتى.

Abai.kz