وتىرىس جۇمىسىنا قر پرەمەر-ءمينيسترىنىڭ ءبىرىنشى ورىنباسارى اسقار مامين، رف ۇكىمەت توراعاسىنىڭ ءبىرىنشى ورىنباسارى انتون سيلۋانوۆ، قىرعىزستان ۆيتسە-پرەمەر-ءمينيسترى جەنيش رازاكوۆ، بر پرەمەر-ءمينيسترىنىڭ ورىنباسارى يگور پەتريشەنكو، ار ۆيتسە-پرەمەرى مگەر گريگوريان، ەەك القاسىنىڭ توراعاسى تيگران ساركيسيان قاتىستى.

وتىرىستىڭ كۇن ءتارتىبى 22 سۇراقتى قامتىدى. كوميسسيا كەڭەسىنىڭ مۇشەلەرى ايرىقشا سۋبسيديالاردىڭ قابىلدانۋ كريتەريلەرى تۋرالى ماسەلەنى، سونداي-اق ەاەو اياسىندا تاۋارلاردىڭ زاڭدى اينالىمىن قامتاماسىز ەتۋگە، تۇتىنۋشىلاردىڭ قۇقىعىن قورعاۋعا جانە ولاردى اداستىراتىن ارەكەتتەردى ەسكەرتۋگە باعىتتالعان ەاەو-دا سايكەستەندىرۋ قۇرالدارىمەن تاۋارلاردى تاڭبالاۋ تۋرالى كەلىسىمدى ىسكە اسىرۋ ماسەلەلەرىن تالقىلادى.

سونداي-اق كوميسسيا كەڭەسىنىڭ ەاەو-نىڭ دسۇ ورگاندارىنا باقىلاۋشى رەتىندە قاتىسۋى ماسەلەسىن پىسىقتاۋ تۋرالى تاپسىرماسى قابىلداندى.

وتىرىس بارىسىندا كەڭەس مۇشەلەرى وسى جىلدىڭ جەلتوقسان ايىندا سانكت-پەتەربۋرگتە وتەتىن جوعارى ەۋرازيالىق ەكونوميكالىق كەڭەس (جوعارى كەڭەس) وتىرىسىنىڭ كۇن ءتارتىبىن ماقۇلدادى.

جوعارى كەڭەستىڭ كۇن ءتارتىبى ەۋرازيالىق ەكونوميكالىق وداقتىڭ (ەاەو) گاز، مۇناي جانە مۇناي ونىمدەرىنىڭ ورتاق نارىعىن قالىپتاستىرۋ ماسەلەلەرىن قامتيدى. ورتاق نارىقتاردى قالىپتاستىرۋ باعدارلامالارىن قابىلداۋ قازاقستاننىڭ بولاشاق تۇراقتى دامۋى ءۇشىن ستراتەگيالىق تۇرعىدان ماڭىزدى، بۇل قازاقستاننىڭ اتالعان سالالارىنىڭ ەكسپورتتىق الەۋەتىن تولىق كولەمدە جۇزەگە اسىرۋعا مۇمكىندىك بەرەدى.

ەاەو اياسىندا ينتەگراتسيالىق ۇدەرىستەردى ودان ءارى دامىتۋ — اسا ماڭىزدى ماسەلە. ينتەگراتسيالىق ۇدەرىستەردى دامىتۋدىڭ نەگىزگى ۆەكتورلارىن قامتيتىن ەاەو-نى ودان ءارى دامىتۋ تۋرالى دەكلاراتسيا قابىلدانۋى ءتيىس.

بۇدان وزگە، 2019 جىلعا ەاەو حالىقارالىق قىزمەتىنىڭ نەگىزگى باعىتتارىن ەنگىزۋ ماقۇلداندى. بۇل قۇجات جىل سايىن ەاەو ءۇشىن ستراتەگيالىق ماڭىزى بار سەرىكتەستەردى انىقتاپ، ولارمەن ىنتىماقتاستىقتى دامىتۋ شارالارىن ايقىنداۋ ماقساتىندا قابىلدانادى.

جالپى العاندا، وتكەن وتىرىس قازاقستاننىڭ ستراتەگيالىق مۇددەلەرىنە جاۋاپ بەرەدى جانە ەاەو-نىڭ ءتيىمدى جۇمىسىنا جاڭا سەرپىن بەرىپ، ەاەو الداعى جۇمىسىندا بىرلەسكەن باعدارلاردى ازىرلەۋگە نەگىز بولادى.

ەۋرازيالىق ەكونوميكالىق كوميسسيا كەڭەسىنىڭ وتىرىسىندا قر پرەمەر-ءمينيسترىنىڭ ءبىرىنشى ورىنباسارى اسقار مامين رف ۇكىمەتى توراعاسىنىڭ ءبىرىنشى ورىنباسارى انتون سيلۋانوۆپەن كەلىسسوزدەر جۇرگىزدى.

تاراپتار ەاەو اياسىندا ساۋدا-ەكونوميكا سالاسىنداعى ىنتىماقتاستىقتى دامىتۋدىڭ پەرسپەكتيۆالارى مەن قازىرگى جاعدايىن تالقىلادى.

اتاپ ايتقاندا، رەسەي فەدەراتسياسى مەن قازاقستان رەسپۋبليكاسىنىڭ اۋماقتارى ارقىلى وتەتىن جۇكتەردىڭ كەدەرگىسىز ءترانزيتىن قامتاماسىز ەتۋ، ەكى ەلدىڭ اۋىل شارۋاشىلىعى سەكتورىن دامىتۋ ءۇشىن قولايلى جاعدايلار جاساۋ ماسەلەلەرى قارالدى.

سونىمەن قاتار، كەزدەسۋ بارىسىندا تاراپتار ەۋرازيالىق ەكونوميكالىق وداق اياسىندا تسيفرلىق باستامالاردى باسقارۋ ءوفيسىنىڭ قىزمەتى تۋرالى ماسەلەنى قوزعادى.

اسقار مامين 9 قاراشادا پەتروپاۆلدا «قازاقستان مەن رەسەيدىڭ ءتۋريزمىن دامىتۋداعى جاڭا تاسىلدەر مەن ۇردىستەر» تاقىرىبىندا XV ايماقارالىق ىنتىماقتاستىق فورۋمى وتەتىنىن اتاپ ءوتتى.

«بۇل فورۋم بارلىق سپەكتر بويىنشا ەلدەر اراسىنداعى ەكىجاقتى ىنتىماقتاستىقتى دامىتۋعا جاڭا سەرپىن بەرەدى»، — دەدى اسقار مامين.

قىرعىزستان رەسپۋبليكاسىنىڭ ۆيتسە-پرەمەر-ءمينيسترى ج. رازاكوۆپەن كەزدەسۋدە قازاقستان مەن قىرعىزستان اراسىنداعى ەكونوميكالىق بايلانىستاردىڭ كەڭ اۋقىمى بويىنشا ءوزارا ءىس-قيمىلدى دامىتۋدىڭ وزەكتى ماسەلەلەرى قارالدى.

اسقار مامين ءوزارا تاۋار اينالىمىن ۇلعايتۋدىڭ ۇلكەن الەۋەتىن اتاپ ءوتىپ، مەملەكەتتەر باسشىلارى 2020 جىلعا قاراي ءوزارا ساۋدا-ساتتىق كولەمىن $1 ملرد دەيىن ۇلعايتۋ مىندەتىن قويعانىن ەسكە سالدى.

شەكاراداعى، كولىك سالاسىنداعى، فيتو-سانيتارلىق جانە ۆەتەرينارلىق باقىلاۋ، كەدەندىك جانە سالىقتىق اكىمشىلەندىرۋدەگى وزەكتى ماسەلەلەردى كەشەندى تۇردە شەشۋگە باعىتتالعان ەكىجاقتى ەكونوميكالىق ىنتىماقتاستىق جونىندەگى جول كارتاسىن ىسكە اسىرۋدىڭ ماڭىزدىلىعى اتاپ ءوتىلدى.

Abai.kz