قازاقستاندا «كونفەدەراتسيا كۋبوگى» وسىمەن ءۇشىنشى جىل قاتارىنان ۇيىمداستىرىلىپ وتىر. ونىڭ ىرىكتەۋ تۋرى ەلىمىزدىڭ 4 قالاسىندا وتەدى. كەلەسى كەزدەسۋ قازاننىڭ 13-14 كۇندەرى تالدىقورعان قالاسىندا وتەدى.

وعان الماتى، اقتوبە، قاراعاندى وبلىستارى مەن استانا جانە شىمكەنت قالالارىنىڭ قۇرامالارى قاتىسادى. ودان كەيىن سەمەيدە قازاننىڭ 20-21 كۇندەرى شىعىس قازاقستان، قوستاناي، باتىس قازاقستان جانە پاۆلودار وبلىستارىنىڭ سپورتشىلارىنىڭ شەبەرلىگى سىنالادى.

الماتى، جامبىل، ماڭعىستاۋ جانە اتىراۋ وبلىسى قۇرامالارىنىڭ كەزدەسۋى اتىراۋ قالاسىندا قازاننىڭ 27-28 جۇلدىزىندا وتەدى دەپ جوسپارلانعان. 4 كەزدەسۋ ناتيجەسىندە ءار سپورت تۇرىنەن ءبىر كوماندادان ىرىكتەلىپ، اقتىق سايىسقا جولداما الادى.

«وسىعان دەيىن بوكستان ىرىكتەۋ كەزەڭى ءوتتى. 4 وبلىس قۇراماسى ىرىكتەلىپ الىندى. ەندى قاراشا ايىندا قازاق كۇرەسىنەن دە مىقتىلار انىقتالادى. سايىستىڭ ەڭ باستى ەرەكشەلىگى – بەلدەسۋلەر ءبىر ۋاقىتتا، ءبىر زالدا وتەدى. بۇل جارىستىڭ باستى ماقساتى – قازاقستاننىڭ بارلىق وبلىستارىنىڭ قۇرامالارى اراسىنداعى باسەكەلەستىكتى ارتتىرۋ. سول ارقىلى اتالعان سپورت تۇرلەرىن دامىتۋ. سوندىقتان، بۇل سايىستا كوماندالىق ەسەپ قانا نازارعا الىنادى. ءار بالۋان جەڭگەن سايىن، ءوز وبلىسىنا 1 ۇپاي اكەلەدى. دەمەك بارلىق سالماق دارەجەسى بويىنشا جاقسى دايىندىق كەرەك. مىسالى، بۇگىنگى جارىسقا اقمولا وبلىسى دزيۋدو مەن تاەكۆان-دودان كوماندا جىبەرمەگەن. بۇل – ۇلكەن ولقىلىق. دەمەك، اتالعان سپورت تۇرلەرى بويىنشا اقمولادا جۇرگىزىلىپ جاتقان جۇمىستا جۇيە جوق»، – دەيدى سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ وكىلى، جارىس ۇيىمداستىرۋشىسى باقىتبەك حاميت.

قىزىلجارداعى كەزدەسۋ ناتيجەسىندە گرەك-ريم كۇرەسىنەن سقو قۇراماسى، ەركىن كۇرەس پەن تاەكۆان-دودان تۇركىستان، دزيۋدودان قىزىلوردا سپورتشىلارى باسىم ءتۇسىپ، ءتۋرنيردىڭ فينالىنا جولداما الدى.

«جارىس العاش ۇيىمداستىرىلعان جىلى سولتۇستىك قازاقستان وبلىسىنىڭ گرەك-ريم قۇراماسى ءۇشىنشى ورىن الدى. ال بىلتىر جولىمىز بولمادى. سوندىقتان وسى جولى كوپ دايىندالدىق. تۇركىستان وبلىسىنىڭ سپورتشىلارى مىقتى بولعانىن مويىنداۋ كەرەك. دەگەنمەن، قىزىلجارلىقتار باسىم ءتۇستى. ەندى جەلتوقسان ايىندا الماتى قالاسىندا وتەتىن جارىسقا دايىندالامىز»، – دەيدى گرەك-ريم كۇرەسىنەن سقو قۇراماسىنىڭ اعا باپكەرى قونىسبەك تۇكەنوۆ.

كەزدەسۋ جەلتوقسان ايىندا الماتى قالاسىنداعى بالۋان شولاق اتىنداعى سپورت سارايىندا وتەدى.

«جارىس تارتىستى ءوتتى. ءوزىم – تۇركىستان وبلىسىنىڭ ەركىن كۇرەس قۇراما كومانداسىنىڭ مۇشەسىمىن. بۇگىنگى دوداعا ءبىزدىڭ وڭىردەن سايدىڭ تاسىنداي ىرىكتەلگەن 6 بالۋان كەلدى. 86 كەلى سالماق جارەجەسىندە بوز كىلەمگە ءۇش رەت شىعىپ، القاشقىسىندا قىزىلوردالىق عالىمجان نوسەرباەۆتان جەڭىلىپ قالدىم. سوڭعى ەكەۋىندە قارسىلاسىمنان باسىم ءتۇستىم. ۇيىمداستىرۋشىلارعا العىسىم شەكسىز»، – دەدى قر سپورت شەبەرى، تۇركىستاندىق سايد اببازوۆ.

كونفەدەراتسيا كۋبوگى 6 سپورت ءتۇرى بويىنشا ۇيىمداستىرىلادى. اتاپ ايتار بولساق: بوكس، تاەكۆان-دو، دزيۋدو، گرەك-ريم، قازاق جانە ەركىن كۇرەس. بۇل قازاقستاندا وتەتىن سايىستاردىڭ ىشىندە جۇلدە قورى ەڭ كوبى. ۇيىمداستىرۋشىلاردىڭ سوزىنە قاراعاندا، 5 وليمپيادالىق سپورت ءتۇرىنىڭ ارقايسىسىنا 25 ميلليون تەڭگەدەن بولىنگەن. قازاق كۇرەسى ەلىمىزدە جاڭا دامىپ كەلە جاتقان سپورت ءتۇرى بولعاندىقتان ونىڭ جۇلدە قورى 20 ميلليون تەڭگە.

abai.kz