الماتى وبلىسىندا 14 سالالىق كاسىپوداق ۇيىمى قىزمەت اتقارادى
تاۋەلسىز قازاقستانداعى كاسىپوداقتاردىڭ از ۋاقىتتا جەتكەن جەتىستىكتەرىنە قاراپ، اتالعان بىرلەستىكتىڭ قوعامدا ءوز ورنى بار الەۋمەتشىل ۇيىم ەكەنىنە كوز جەتكىزەمىز. ويتكەنى ەلىمىزدىڭ كاسىپوداق ۇيىمدارى ازاماتتاردىڭ قۇقىقتارى مەن مۇددەلەرىن قورعاۋ، جۇمىس جاعدايىن جاقسارتۋ، ءومىر ءسۇرۋ دەڭگەيىن كوتەرۋ مەن الەۋمەتتىك كەپىلدىكتى قامتاماسىز ەتۋ ماقساتىندا ءبىرشاما جۇمىس اتقارۋدا.
جالپى ەلىمىزدەگى كاسىپوداق قوزعالىسىنىڭ جۇمىسى حح عاسىردان باستاۋ العانى ەشكىمگە جاسىرىن ەمەس. جانە العاشقى كاسىپوداق ۇيىمى قازىرگى قاراعاندى وبلىسىنا قاراستى ۋسپەن مىس كەن ءوندىرۋ ورنىنداعى جۇمىسشىلار وداعىنىڭ باستاماسىمەن قۇرىلعان بولاتىن.
كاسىپوداق – قوعامدا وزگەدەن وزىق، ءبىتىم-بولمىس جاعىنان ەشكىمگە ۇقساي بەرمەيتىن، رۋحاني جاعىنان سالماقتى ورنى بار، ۇلكەن بەدەلگە يە ۇيىم. ال كاسىپوداقتاردىڭ قازىرگى قوعامداعى ءوز ورنىن تابۋى، زامان اعىمىنا ساي قىزمەت كورسەتۋى ۇلكەن ىسكەرلىكتى تالاپ ەتەدى. ءبۇگىنگى تاڭدا كاسىپوداقتار ۇيىمى ۇكىمەتتىك جانە بيزنەس وكىلدەرىمەن بىرلەسە، زاماناۋي قازاقستاندىق قوعامدى قالىپتاستىرۋ جولىندا جۇمىس ىستەپ كەلەدى. قوعامدىق جۇيەنىڭ بولىگى رەتىندە ۇدەمەلى تۇردە وزگەرىپ جاتقان قۇبىلىستارعا ءۇن قوسىپ، قاراپايىم ەڭبەكشى حالىقتىڭ يگىلىگىنە قىزمەت ەتۋ اتالعان ۇيىم ءمۇشەلەرىنە ۇلكەن جاۋاپكەرشىلىك جۇكتەيدى.
«الماتى وبلىسىنىڭ كاسىپوداقتار ورتالىعى» اۋماقتىق كاسىپوداقتار ءبىرلەستىگى دە ازاماتتىق قوعامنىڭ جارقىن ۇلگىسىندەي بولىپ، 2015 جىلى كوپشىلىكتىڭ قالاۋىمەن قۇرىلعان بولاتىن. ورتالىق قۇرىلعاننان بەرى مەكەمەلەردەگى ەڭبەك ۇجىمدارىن كاسىپوداق قوزعالىسىنا تارتۋ، جاڭادان باستاۋىش كاسىپوداق ۇيىمدارىن قۇرۋ، جۇمىس ىستەپ جاتقان كاسىپتىك وداقتاردىڭ قىزمەتتەرىن رەتكە كەلتىرۋ بويىنشا ۇلكەن جۇمىس اتقاردى.
جالپى وسى جەردە زاڭدى سۇراق تۋادى: كاسىپوداقتىڭ قاجەتتىلىگى نەدە، ول جۇمىسشىلارعا نە بەرەدى، ەڭ باستىسى، ەڭبەك داۋلارىنا بايلانىستى ولاردىڭ قۇقىقتارىن قورعاي الا ما؟ مىنە، وسىنداي سان ءتۇرلى ساۋالدارعا جاۋاپ بەرە وتىرىپ، ءبىز بىردەن ەڭبەك ۇجىمدارى اراسىندا ءتۇسىندىرۋ جۇمىستارىن باستاپ كەتتىك. ارينە، بىرەۋلەر دۇرىس قابىلداسا، كەيبىرەۋلەر كاسىپوداققا سەكەممەن قارادى. ءبىز مۇمكىندىگىنشە ءاربىر ۇجىمداعى ەڭبەككە بايلانىستى پروبلەمالاردى كوتەرىپ، ونىڭ شەشۋ جولدارىن قاراستىردىق.
بىردە وبلىستىق مادەنيەت باسقارماسىنا قارايتىن مۇراعات سالاسىنىڭ قىزمەتكەرلەرىمەن كەزدەسكەندە، ەسكى قۇجاتتارمەن جۇمىس ىستەگەندەرگە ۇستەمەاقى تولەنبەيتىنى انىقتالدى. ءبىز وسى ءماسەلەگە بايلانىستى الەۋمەتتىك سەرىكتەسىمىز – جەرگىلىكتى باسقارۋ ورگاندارىنا حات جولداپ، ۇشجاقتى كەلىسىم جاسادىق. وسىلايشا زاڭ تۇرعىسىنان قاراستىرا كەلە، ولارعا مىندەتتى تۇردە ۇستەمەاقى تولەۋ كەرەكتىگىن دالەلدەدىك. ءناتيجەسىندە، وبلىستىڭ بيۋدجەتىن قالىپتاستىرۋ كەزىندە قوسىمشا قاراجات ءبولىنىپ، مۇراعات قىزمەتكەرلەرىنە ۇستەمەاقى تولەنە باستادى.
وتكىزەتىن شارالارعا مۇمكىندىگىنشە ءماسليحات دەپۋتاتتارىن، وبلىستىڭ قۇرمەتتى ازاماتتارىن، قوعام قايراتكەرلەرىن، قۇقىق قورعاۋ سالاسىنىڭ قىزمەتكەرلەرىن، جاستاردى، جەرگىلىكتى اتقارۋشى ورگاندار مەن باق وكىلدەرىن قاتىستىرا وتىرىپ، قاتارداعى قاراپايىم جۇمىسشىلاردىڭ پىكىرىن تىڭدايمىز. ولاردىڭ كوزقاراستارىن ەسكەرىپ، بەرگەن ۇسىنىستارىن شەشۋگە بارىنشا تىرىسامىز. ءويتكەنى مۇنداي جۇمىستار كاسىپوداقتىڭ يميدجىن كوتەرۋمەن قاتار، قوعامدىق كوزقاراستى قالىپتاستىرۋعا ءوز سەپتىگىن تيگىزەدى.
مەملەكەتتىڭ، جۇمىس بەرۋشىلەردىڭ جانە قىزمەتكەرلەردىڭ الەۋمەتتىك جاۋاپكەرشىلىگى، ءوزارا سىيلاستىعى مەن ولاردىڭ مۇددەلەرىن بىلدىرۋگە ارنالعان الاڭدار قۇرىلىپ، بىرقاتار ماسەلەلەر ءوز شەشىمىن تابۋدا. سونىڭ ىشىندە الەۋمەتتىك ارىپتەستىك جانە الەۋمەتتىك-ەڭبەك قاتىناستارى، ۇجىمدىق شارتتاردىڭ دايىندالۋى مەن ورىندالۋى جاڭا فورماتتا جۇرگىزىلە باستادى. سونداي-اق، كاسىپوداق ۇيىمدارىمەن ۇجىمدىق كەلىسىمشارتتاردىڭ بەكىتىلۋى جانە ونىڭ ورىندالۋى ساراپتامادان ءوتىپ، ۇنەمى مونيتورينگ جۇرگىزىلىپ وتىرادى.
جالپى الماتى وبلىسىندا 14 سالالىق كاسىپوداق ۇيىمى قىزمەت اتقارادى. ولاردىڭ جۇمىسىن ۇيلەستىرۋ، ادىستەمەلىك كومەك بەرۋ، بىلىمدەرىن جەتىلدىرۋ بويىنشا ارنايى كۋرستار ۇيىمداستىرۋ جۇمىستارى وڭ جولعا قويىلعان. ونىڭ ۇستىنە، جەتىسۋ ءوڭىرى ەلىمىزدەگى ەكونوميكالىق، رۋحاني، ساياسي تۇرعىدان وزىندىك ورنى بار ايماقتاردىڭ ءبىرى سانالادى. ايماقتا جۇزگە جۋىق ەتنوس وكىلدەرى تۇرادى. بۇگىندە حالىق سانى ستاتيستيكاعا سايكەس 2 ميلليوننان اسادى. اتقارىلىپ جاتقان جۇمىستى ءارى قاراي وڭتايلاندىرۋ ءۇشىن جەرگىلىكتى اتقارۋشى ورگاندارمەن، كاسىپوداقتار جانە ونەركاسىپ باسشىلارىنىڭ اراسىندا وندىرىستىك پروتسەستى بىرىڭعاي قالىپقا كەلتىرۋ جانە ەڭبەك قۇقىعىن ساقتاۋ بويىنشا مەموراندۋمدارعا قول جەتكىزدىك.
بيىل الماتى وبلىسىنىڭ سوتى، مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگىنىڭ الماتى وبلىستىق دەپارتامەنتى، حالىققا قىزمەت كورسەتۋ ورتالىعى جانە اۋماقتىق كاسىپوداقتار ورتاسىندا مەموراندۋمعا قول قويىلدى. قازىر وبلىستىق سوت جانە تالدىقورعان سوتىنىڭ عيماراتتارىندا سوتقا دەيىنگى داۋلاردىڭ الدىن الۋ ءۇشىن «تاتۋلاسۋ ورتالىقتارى» جۇمىس ىستەۋدە. وسى ماقساتتا وبلىستىق سوتتىڭ عيماراتىندا اشىلعان قۇقىقتىق قىزمەتتەر ورتالىعىنا جوعارى دارەجەلى مەدياتوردى قىزمەتكە الدىق. ەندى، مەدياتوردىڭ كومەگىنە باسشىدان باستاپ، قاتارداعى قىزمەتكەرگە دەيىن جۇگىنىپ، كەڭەس الاتىن بولادى.
اسەت قىدىرمانوۆ، الماتى وبلىسىنىڭ كاسىپوداقتار ورتالىعى اۋماقتىق كاسىپوداقتار بىرلەستىگىنىڭ توراعاسى
Abai.kz
