اقتوبە قالاسىندا قازاقتىڭ باتىر قىزى ءاليا مولداعۇلوۆانىڭ ەسىمى بەرىلگەن كوپىر اشىلدى، دەپ حابارلايدى اباي-اقپارات قازاقپاراتقا سىلتەمە جاساپ.

«قىركۇيەك ايىندا ءۇشىنشى كوپىر پايدالانۋعا بەرىلىپ وتىر. حالىق سۇراۋىن ەسكەرىپ، 5 اي بۇرىن قۇرىلىس جۇمىستارى باستالدى. كوپىر قۇرىلىسى 2,5 ايدا اياقتالدى. اقتوبەنىڭ الماتى مەن استانا اۋدانىن قوساتىن كوپىرگە ءاليا مولداعۇلوۆانىڭ ەسىمى بەرىلەدى»، - دەدى سالتاناتتى شارا بارىسىندا وبلىس اكىمى بەردىبەك ساپارباەۆ.

اقتوبە قالاسىندا كولىك كەپتەلىسىن ازايتۋ ءۇشىن كوپىرگە قوسىمشا ەكى وتپەجول سالىندى. قۇرىلىس جۇمىستارىنا بيۋدجەتتەن 1,2 ميلليارد تەڭگە جۇمسالدى.

قۇرىلىس جۇمىستارىن تولىعىمەن 2019 جىلدىڭ تامىز ايىندا اياقتاۋ جوسپارلانعان.

ايتا كەتەيىك، ءىرى جوبانى ىسكە اسىرۋ كەزىندە تۋننەل قابىرعالارىن نىعايتۋ جانە بەكىتۋ، كوممۋنالدىق جانە بايلانىس جەلىلەرىن قوسۋ،  اسفالت توسەۋ جۇمىستارى جۇرگىزىلدى. جاڭا وتپەجولدى استانالىق «پروگرەسس KZ» جشس سالدى.

Abai.kz