«بۇگىن استانادا "ادامزات. شەكسىزدىك. ماڭگىلىك" اتتى ەۋرازيالىق ادەبي فورۋمى ءوز جۇمىسىن باستادى. فورۋمدى قر مادەنيەت جانە سپورت ءمينيسترى ارىستانبەك مۇحامەديۇلى قۇتتىقتاۋ سوزىمەن اشتى. ادەبي فورۋمعا ەۋرازيا قۇرلىعىنىڭ تۇكپىر-تۇكپىرىنەن شەتەل قالامگەرلەرى مەن قازاق ءسوز ونەرىنىڭ مايتالماندارى جينالۋدا» دەپ حابارلادى «Abai.kz» اقپاراتتىق پورتالى.

اتالعان فورۋم ەلوردامىز استانانىڭ 20 جىلدىعىنا ارنالىپ وتۋدە ەكەن. سونداي-اق، بۇل شاراعا ەكى الىپ قۇرلىقتىڭ تۇكپىر-تۇكپىرىنەن ءوز ەلىنە كەڭ  تانىلعان، ۇلت قالامگەرلەرى شاقىرىلىپتى. ءدال وسىنداي اۋقىمدى باسقوسۋ  1973 جىلى وتكىزىلىپتى. مىنە، سودان بەرى 45 جىل ءوتىپتى.

وتە قۋانىشتى جاعداي بۇل! اتالعان جيىنعا ساتتىلىك، تابىس جانە ناتيجە تىلەيمىن!

اقىن، جازۋشى، سۋرەتشى، كومپوزيتور، ونەر يەلەرى قاي ۇلتتىڭ بولماسىن الاقانىنا سالىپ الپەشتەيتىن، قۇرمەت تۇتاتىن، ءۇمىت ارتاتىن ادامدارى. ۇلت باسىنا كۇن تۋعاندا، ءبىرىنشى بولىپ كوسىلىپ ءسوز ايتاتىن، بىلەك ءتۇرىپ الدىمەن مايدانعا شىعاتىن سەركەلەرى. قازاق اقىنى تولەگەن ايبەرگەنوۆتىڭ سوزىمەن ايتساق، «بۇل ءوزى سىزداعان بارلىق جارانىڭ اۋزىندا جۇرەتىن» مارقاسقالارى!

بۇگىنگى "ادامزات. شەكسىزدىك. ماڭگىلىك" اتتى ەۋرازيالىق ادەبي فورۋمعا جيىلعان اعا بۋىن اقىن جازۋشىلار وتە جاقسى بىلەدى، 1970 جىلى قازاندا  اقش كومپارتياسىنىڭ مۇشەسى دەيۆيس اندجەلا يۆونن ءوزىنىڭ وزىق ويلى كوز قاراستارى ءۇشىن «كىسى ولىمىنە قاتىستى» دەگەن جالعان ايىپ تاعىلىپ، تۇتقىنعا الىنعاندا، دۇنيە ءجۇزىنىڭ بۇكىل كوممۋنيستەرى «تارت قولىڭدى دەيۆيستەن!!!» دەپ  ءدۇر سىلكىنگەن بولاتىن. كوردىڭىز بە، ءبىر دەيۆيس اندجەلا ءۇشىن!

بۇگىن شە؟! بۇگىن قازاقتىڭ ۇلكەن ءبىر قاناتى، قوماقتى ءبولىمى، شىڭجاڭداعى ەكى ميلليونعا جۋىق قانداسىمىز زار جۇتىپ، زاپىران قۇسىپ جاتىر. قازاق قانا ەمەس، ۇيعىر، وزبەك، قىرعىز، موڭعول، تاجىك، ءازىربايجان ت.ب. ەتنيكالىق ۇلت وكىلدەرى ساياسي قۋدالاۋ كورۋدە.

"ادامزات. شەكسىزدىك. ماڭگىلىك" تۋرالى الەمدىك تاقىرىپتى قاۋزاۋعا ەكى بىردەي كارى قۇرلىقتىڭ ساڭلاقتارىن استانا تورىنە شاقىرىپ وتىرعان قازاقستان جازۋشىلار وداعىنىڭ دا سول قازاقتى جوقتاپ، قىتاي ۇكىمەتىنە «تارت قولىڭدى قازاقتان!!!» دەپ ءبىر ۇران تاستايتىن كەزى كەلىپ تۇر!

«تارت قولىڭدى دەيۆيستەن!!!» دەپ ۇرانداتقان اعا-اپايلارىمىزدىڭ ءبىر ءبولىمى، مۇمكىن، وسى فورىمعا قاتىسىپ وتىرعان دا شىعار. سەبەبى، ءبىزدىڭ قازاق قالامگەرلەرىنىڭ ۇلكەن بۋىنى ازامزاتتىڭ قانىن سۋداي اعىزعان كوممۋنيستىك جۇيەنىڭ تەكپىسىن ءبىر كىسىدەي-اق كوردى، كورمەگەنى ەستىدى!

سوندىقتان، مەن "ادامزات. شەكسىزدىك. ماڭگىلىك" فورۋمىنان شىڭجاڭداعى قازاقتاردى جانە ەتنيكالىق از ۇلت وكىلدەرىن «ساياسي ۇيرەنۋ» لاگەرىنەن بوساتۋ، بولىنگەن-جارىلعان وتباسى مۇشەلەرىن ءبىر-بىرىنە قوسۋ جانە قانداستارىمىزدىڭ ەكى ەل اراسىنداعى بارىس-كەلىسىن باياعى قالپىنا كەلتىرۋ تۋرالى قىتاي حالىق رەسپۋبليكاسىنىڭ پرەزيدەنتى سي تسزينپين مىرزاعا ۇندەۋ جاريالاۋىن، ول ۇندەۋدى استاناداعى قحر ەلشىسىن شاقىرىپ، قولىنا تاپسىرۋدى ءۇمىت ەتەم!

قۇرمەتپەن،

اۋىت مۇقيبەك، اقىن.

Abai.kz