قر تۇڭعىش پرەزيدەنتى ساياباعىندا ەڭ ۇزىن قۇراق كورپە تىگىلىپ، گيننەستىڭ  الەمدىك رەكوردتار كىتابىنا ەندى. قۇراق كورپە 10 900 مەتر ۇزىندىقتى  بويلاي توسەلدى، دەپ جازادى اباي-اقپارات turkystan.kz-كە سىلتەمە جاساپ.

ەسكە سالا كەتسەك، اۋقىمدى كورپەنى تىگۋ كوكتەمدە – ناۋرىز مەرەكەسىندە باستالعان ەدى.

16 قىركۇيەك كۇنى الماتى كۇنى اتالىپ ءوتىپ، قالا اكىمى باۋىرجان بايبەك الماتىلىقتارعا ءوز لەبىزىن ءبىلدىردى. ول جەر استى وتكەلى جۇمىستارى قالالىقتاردىڭ جوعارى باعاسىن العانىن ايتتى.  «قۇرمەتتى الماتىلىقتار، ءالى دە اياقتالماعان شارۋالار بار. بىرگە بار كۇشىمىز بەن ىنتامىزدى سالىپ، الماتىنى ارقايسىسىمىزدىڭ ارمانىمىزداعى قالاعا اينالدىرا الامىز. شىن جۇرەگىممەن قالامىزدىڭ كوركەيۋىنە تىلەۋلەستىگىمدى بىلدىرەمىن»، – دەدى باۋىرجان بايبەك.

سونداي-اق، انگليادان ارنايى كەلگەن دجوانن برەنت  قالا اكىمىنە سەرتيفيكات تابىستادى. وندا الماتىلىق ىسمەرلەردىڭ شىنىمەن دە رەكوردقا كىرگەنى تۋرالى جازىلعان. گيننەسس رەكوردتار كىتابىنىڭ وكىلدەرى وزدەرىمەن بىرگە گەودەزياشى مامانداردى دا ەرتە كەلىپتى. ولار تىگىلىپ بىتكەن، سان ءتۇرلى ءارى ءساندى كورپەنىڭ ناقتى ۇزىندىعىن لازەرلىك قۇرىلعىمەن ولشەدى. «سىزدەردى الەمدەگى ەڭ ۇزىن قۇراق كورپە تىگىپ، گيننەستىڭ رەكوردتار كىتابىنا كىرۋلەرىڭىزبەن قۇتتىقتايمىن. قازاقستاندىق قۇراق كورپەنى كورۋ ءۇشىن ارنايى كەلدىك. بۇل شىنىمەن دە ەرەكشە تۋىندى ەكەن. بوياۋى قانىق، ءپىشىمى دە كوز تارتادى. ءدال وسىنداي تۋىندىنى العاش رەت كورۋىم»، – دەدى «گيننەسس رەكوردتار كىتابى» باس كەڭسەسىنىڭ وكىلى دجوانن برەنت.

ەندى الەمدەگى ەڭ ۇزىن قۇراق كورپەنىڭ وتانى – الماتى. وسىلايشا، قازاقستاندىق تىگىنشىلەر 2 جىل بۇرىن مالايزيادا تىركەلگەن رەكوردتى جاڭارتتى.

قالا كۇنى اياسىندا قر تۇڭعىش پرەزيدەنتى ساياباعى، پانفيلوۆ، جىبەك جولى كوشەلەرى، Almaty Arena, اباي مەن «استانا» الاڭىندا، كوكتوبە مەن ورتالىق مادەني جانە دەمالىس ساياباعىندا «Apple Fest» الما فەستيۆالى ءوتىپ، قالا تۇرعىندارىنا 2 توننا 415 كەلى الما تاراتىلدى.

Abai.kz