«باسپانا» يپوتەكالىق ۇيىمى الماتىداعى «7-20-25» باعدارلاماسىنىڭ بارلىق ساتىلاتىن پاتەرلەرى #expohomsters جىلجىمايتىن مۇلىك جارمەڭكەسىندە ۇسىنىلاتىنىن حابارلايدى. جارمەڭكە 15-16 قىركۇيەكتە "Dostyk Plaza" ويىن-ساۋىق ورتالىعىندا وتكىزىلەدى. جارمەڭكە ۇيىمداستىرۋشىسى Homsters.kz ونلاين-سەرۆيسى.

جارمەڭكەگە الماتى قالاسى بويىنشا 70-تەن استام تۇرعىن ءۇي كەشەندەرىنىڭ وكىلدەرى قاتىسپاق. ولار بارلىق كەلۋشىلەرگە «7-20-25» باعدارلاماسى ارقىلى بەرىلەتىن تۇرعىن ءۇي، ونى ساتىپ الۋدىڭ باعاسى مەن مۇمكىندىكتەرى تۋرالى اقپارات بەرۋگە دايىن.

سونىمەن قاتار كەلۋشىلەرگە ەكىنشى دەڭگەيلى بانك وكىلدەرى مەن «باسپانا» يپوتەكالىق ۇيىمى ماماندارى كەڭەس بەرمەك.

"تۇرعىندار تاراپىنان «7-20-25» باعدارلاماسى بويىنشا ىسكە اسىرىلاتىن تۇرعىن ءۇي كەشەندەرىنىڭ ءتىزىمى تۋرالى كوپتەگەن سۇراقتار تۋىندايدى. اسىرەسە، استانا جانە الماتى تۇرعىندارى وسى اقپاراتقا ءزارۋ بولىپ وتىر. مۇنداي جارمەڭكە ساتۋشىلار، ساتىپ الۋشىلار مەن بانكيرلەردى ءبىر جەردە بىرىكتىرۋگە مۇمكىندىك بەرەدى»، - دەدى «باسپانا» يپوتەكالىق ۇيىمىنىڭ باسقارما  توراعاسى قايرات التىنبەكوۆ. ەكى كۇن ىشىندە جارمەڭكەگە 5 مىڭنان استام الماتى تۇرعىندارى مەن قوناقتارى كەلەدى دەپ كۇتىلۋدە. بۇل «7-20-25» باعدارلاماسى بويىنشا الماتىدا  پاتەر ساتىپ العىسى كەلگەندەر ءۇشىن تاپتىرماس مۇمكىندىك.

Abai.kz