الماتىدا مەديتسينا ماماندارى قاتەرلى ىسىككە شالدىققان ناۋقاستاردىڭ دارىلىك زاتتار تاپشى دەگەن شاعىمىنا بايلانىستى تۇسىنىكتەمە بەردى.

الماتى وڭىرلىك كوممۋنيكاتسيالار قىزمەتىندە قالالىق دەنساۋلىق ساقتاۋ باسقارماسى باسشىسىنىڭ ورىنباسارى نۇرجان يسابەكوۆ،  «الەۋمەتتىك مەديتسينالىق ساقتاندىرۋ قورىنىڭ» الماتىداعى بولىمشەسىنىڭ ديرەكتورى تولەۋحان ابىلداەۆ، «سك فارماتسيا» كومپانياسىنىڭ وكىلى ناتاليا زەلەنسكايا اتالعان جايتكە بايلانىستى تۇسىنىكتەمە بەردى.

نۇرجان يسابەكوۆتىڭ ايتۋىنشا، دارىلىك زاتتىڭ ۋاقىتشا تاپشىلىعى ءسۇت بەزىمەن اۋىراتىن ايەلدەردىڭ سانىنىڭ 5 پايىزعا ارتۋىنا بايلانىستى بولىپ وتىر.

ء"ار سالادا جىل سوڭىندا قالادا تىركەلگەن ناۋقاستاردىڭ سانىنا قاراي تاپسىرىس بەرىلەدى. قازىر بۇل پروبلەما ءسۇت بەزى قاتەرلى ىسىگىمەن  اۋىراتىندارعا ءدارىنىڭ ءبىر ءتۇرى گەرتسيپتين بويىنشا بولىپ تۇر. ناۋقاستاردىڭ سانى كوبەيگەندىكتەن دارىلىك زاتتار جەتپەي قالدى. بىلتىرعىمەن سالىستىرعاندا ولاردىڭ سانى 5 پايىزعا ارتىپ وتىر", - دەدى قالالىق دەنساۋلىق ساقتاۋ باسقارماسى باسشىسىنىڭ ورىنباسارى نۇرجان يسابەكوۆ.

مامانداردىڭ ايتۋىنشا، الماتىدا قازىر 32 ناۋقاس ايەل اي سايىن گەرتسيپتين پرەپاراتىن الىپ تۇرۋى كەرەك. ءار ناۋقاس 18 امپۋلانى 1,5 جىلدا قابىلداۋى ءتيىس. ءبىر امپۋلا قۇنى 300000 تەڭگەگە باعالانعان. اتالعان ءدارى ءدارىحانالاردا ساتىلمايدى. تەك بىرىڭعاي ديستريبيۋتور «سك فارماتسيا» ارقىلى عانا جەتكىزىلەدى.

"بيىل الماتىدا 5426 ايەل ەسەپتە تۇر. 8 ايدا  تاعى 406 ايەلدەن قاتەرلى ىسىك انىقتالدى.  بىلتىرعىمەن سالىستىرعاندا 5 پايىزعا ارتقان. ولاردىڭ 32-ءسى وسى دارىگە مۇقتاج. بۇگىندە 50 امپۋلا مۇقتاج ادامدارعا قىزىلوردا وبلىسىنان قارىزعا الىنىپ بەرىلدى. ءبىزدىڭ تاپسىرىس جەتكەن سوڭ ورنىنا قايتارىلادى", - دەدى الماتى ونكولوگيالىق ورتالىعىنىڭ ديرەكتورى نۇرسۇلتان ىزباعامبەتوۆ.

ال دارىلىك زاتتىڭ ۋاقىتىندا جەتكىزىلمەۋىن «سك فارماتسيا» وكىلى ناتاليا زەلەنسكايا بىلايشا ءتۇسىندىردى.

«2018 جىلعا الماتى ونكولوگيالىق ديسپانسەرى 2,2 ملرد تەڭگەگە تاپسىرىس بەردى. تاپسىرىستى قاراستىرۋ كەزىندە 1,9 ملرد تەڭگەنىڭ ءونىمى ماقۇلداندى. 1,7 ملرد تەڭگەنىڭ دارىلىك زاتتارى جەتكىزىلدى. گەرتسيپتين پرەپاراتى قازاقستانعا قىركۇيەكتە جەتكىزىلگەن. قازىر سەرتيفيكاتسيا پروتسەدۋراسىندا تۇر»، - دەدى ن.زەلەنسكايا.

ەندى قالا بيلىگى تاپشى دارىلەردى جەتكىزۋگە بيۋدجەتتەن قوسىمشا قارجى قاراستىرماقشى.

«بيىل الماتى ونكولوگيالىق قىزمەتى 2017 جىلعى دەڭگەيدە قارجىلاندىرىلدى. دارىلىك زاتتارمەن قامتۋدا تۇيتكىلدى ماسەلە جوق. تەك ءبىر اۋرۋ بويىنشا دارىلىك زاتتىڭ ءبىر ءتۇرى جەتكىزىلمەي جاتىر. وعان قوسىمشا قاجەتتىلىك تۋىندادى. بۇل ماسەلەنى ءبىزدىڭ قوردىڭ ورتالىق اپپاراتى مەن قر دسم اپپاراتى جان-جاقتى قاراستىرۋدا»، - دەدى «الەۋمەتتىك مەديتسينالىق ساقتاندىرۋ قورىنىڭ» الماتىداعى بولىمشەسىنىڭ ديرەكتورى تولەۋحان ابىلداەۆ.

ونىڭ ايتۋىنشا، بيىل الماتى ونكولوگيالىق قىزمەتىنە 3 ملرد 222 ملن تەڭگە بولىنگەن.

ايتا كەتۋ كەرەك، الماتى قالالىق ونكولوگيالىق ورتالىعىنىڭ پاتسيەنتتەرى دارىلىك زاتتارعا ۋاقىتىندا قول جەتكىزە الماي جاتقاندارىنا شاعىمدانعان بولاتىن.

ايتۋلارىنشا،  تەندەر ۇتىپ العان "سك-فارماتسيا" كومپانياسى  دارىلەردى ۋاقىتىندا جەتكىزبەگەن.

جالپى بيىل شۆەيتساريادان قۇنى 2,5 ملرد تەڭگە بولاتىن 55 اتاۋلى دارىلىك زات جەتكىزۋ جوسپارلانعان.

Abai.kz