جانار مامىروۆانىڭ ايتۋىنشا، جاڭا وقۋ جىلىنان باستاپ ءمينيستردىڭ بۇيرىعىمەن وقۋشى قىزداردى ورامالمەن مەكتەپكە كىرگىزبەگەنى ءۇشىن وزىنە كەيبىر اۋىل تۇرعىندارى قوقان-لوقى كورسەتكەن. "مەنى وقۋشى قىزدارعا ورامالىن شەشكىزگەنىم ءۇشىن ايىپتايدى. ۇيالى تەلەفونىما بەلگىسىز نومىرلەردەن ورامالدى شەشكىزگەنىڭ ءۇشىن اتىپ كەتەمىز دەگەن xاتتار تۇسكەن سوڭ پوليتسياعا ارىزداندىم" دەيدى ديرەكتور.
جانار مامىروۆانىڭ ماقتارال اۋداندىق ىشكى ىستەر بولىمىنە ارىز تۇسىرگەنىن وبلىستىق ىشكى ىستەر دەپارتامەنتىنىڭ ءباسپاسوز xاتشىسى سالتانات قاراكوزوۆا راستادى. ونىڭ سوزىنشە، ارىزعا سايكەس قىلمىستىق كودەكستىڭ "قورقىتۋ" بابى بويىنشا ءىس قوزعالعان. سوتقا دەيىنگى تەرگەۋ امالدارى جۇرگىزىلىپ جاتىر.
فيرداۋسي اتىنداعى مەكتەپتە ورامالىن شەشۋدەن باس تارتقان وقۋشى قىزداردى قولداپ، مەكتەپ الدىندا نارازىلىق بىلدىرگەن سەگىز اتا-انا بۇعان دەيىن اكىمشىلىك جاۋاپقا تارتىلعان. ءارتۇرلى سەبەپپەن 15 وقۋشى باسقا مەكتەپتەرگە اۋىسقان.
قىركۇيەكتىڭ 6-سى كۇنى فيرداۋسي اۋىلىندا مەكتەپكە ورامالىن شەشىپ بارۋدا باس تارتقان 13 وقۋشى قىزدىڭ اتا-اناسىنا بەس ايلىق ەسەپتىك كورسەتكىشكە ء(بىر ايلىق ەسەپتىك كورسەتكىش - 2405 تەڭگە) تەڭ ايىپپۇل سالىنعان.
فيرداۋسيدەگى ورامال داۋى ءبىلىم جانە عىلىم مينيسترلىگىنىڭ 2016 جىلى قاڭتاردا شىعارعان بىرىڭعاي مەكتەپ فورماسى ەرەجەسى تۋرالى №26 بۇيرىعىنان كەيىن تۋىنداي باستاعان. قۇجاتتا مەكتەپتە قانداي دا ءبىر ءدىندى ناسيحاتتايتىن كيىم كيۋگە تىيىم سالىنعان. بيلىك بۇيرىقتىڭ ورىندالۋىن تالاپ ەتسە، اتا-انالار ءداستۇردى العا تارتىپ، قىزدارىنىڭ مەكتەپكە ورامالسىز بارۋىنا قارسى شىعادى.
مينيسترلىك بۇيرىعى بىلتىر كۇزدە اقتوبە، باتىس قازاقستان جانە ماڭعىستاۋ وبلىستارىندا دا كەيبىر مەكتەپ اكىمشىلىگى مەن اتا-انا اراسىنداعى "ورامال داۋىنا" سەبەپشى بولعان. اتالعان ايماقتاردا مەكتەپ اكىمشىلىگى ساباققا كىرگىزبەي قويعان ونداعان وقۋشىنىڭ اتا-اناسى سوتقا ارىز بەرگەن. تۇرعىندار شاعىمىن قاراعان سوتتار ءبىلىم جانە عىلىم مينيسترلىگى مەن مەكتەپتىڭ ۇستانىمىن قولداعان.
Abai.kz
