الماتىدا مەگاپوليس حالقى ءۇشىن ءداستۇرلى مادەني شارالاردىڭ بىرىنە اينالىپ ۇلگەرگەن «كوكتوبە Opera-2018» فەستيۆالى وتەدى. بيىل ءۇشىنشى رەت وتكەلى وتىرعان فەستيۆال ەكى كۇن قاتارىنان – 25-26 تامىز كۇندەرى ۇيىمداستىرىلماق، - دەپ حابارلايدى اباي-اقپارات "الماتى اقشامىنا" سىلتەمە جاساپ.

فەستيۆالدى ۇيىمداستىرۋشى الماتى قالاسى اكىمدىگى مادەنيەت باسقارماسىنىڭ حابارلاۋىنشا، وپەرا جانرىنىڭ تالعامپاز تىڭدارمانى بۇل جولى كەشتىڭ باستى قونا­عى ۆينچەنتسو كوستانتسانىڭ ونەرىن تاماشالاي الادى. سونداي-اق، كلاسسيكالىق ءان مەرەكە­سىندە سيمفونيالىق وركەستردىڭ سۇيەمەل­دەۋىمەن اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ تانىمال سوليستەرى مەن وپەرا جۇلدىزدارى الەمنىڭ ەڭ ۇزدىك كومپوزيتورلارىنىڭ تۋىندىلارىن تارتۋ ەتەدى.

الماتى قالاسى اكىمدىگى مادەنيەت باس­قارماسى حابارلاعانداي، بيىلعى فەستيۆال قالا كۇنى مەرەكەسىنە تارتۋ رەتىندە ارنايى ۇيىمداستىرىلىپ وتىر. ديريجەر – قازاق­ستاننىڭ ەڭبەك سىڭىرگەن قايراتكەرى الان بورىباەۆ.

ەسكە سالا كەتەيىك، «كوكتوبە Opera» فەستيۆالى العاش الماتىدا 2016 جىلى اسەم قالانىڭ 1000 جىلدىق مەرەيتويىنا وراي شىمىلدىعىن اشقان بولاتىن. سودان بەرى جىل سايىن وتكىزىلىپ كەلە جاتقان فەستيۆال ونەر شىڭى – وپەرا تىڭدارمانىنىڭ سۇيىكتى مەرەكەسىنە اينالدى.

الماتىلىقتار مەن قالا قوناقتارى ليسسابونداعى «سان-كارلۋش»، مودەندەگى لۋچانو پاۆاروتتي، نەاپولداعى «سان كارلو» تەاترلارىنىڭ ءسوليسى الەحاندرو روي، ۆينچەنتسو كوستانتسا سىندى ساڭلاقتاردىڭ ونەرىنە ءتانتى بولعان. سونىمەن قاتار، فەستيۆالدا قر مەملەكەتتىك سىيلىعىنىڭ لاۋرەاتى تالعات كۇزەنباەۆ، قازاقستاننىڭ ەڭبەك سىڭىرگەن قايراتكەرى ءجاميلا باس­پاقوۆا، گۇلزات داۋىرباەۆا، وكسانا داۆى­دەنكو، دانا تالاسبەكوۆا، قايرات ومىربەكوۆ، ۆەنەرا الپىسباەۆا، الەكساندر سمەتانين، ەميل ساكاۆوۆ جانە ەلەنا نيكونوۆا سىندى حالىقارالىق كونكۋرستاردىڭ لاۋرەاتتارى ونەر كورسەتىپ كەلەدى.

بيىلعى كەشتە دە اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ايگىلى سوليستەرى نەگىزگى كومپوزيتسيالاردى ورىندايدى.

ديريجەر الان بورىباەۆ كلاسسيكالىق مۋزىكا مەرەكەسىنە قاتىستى باق-قا بەرگەن سۇحباتىنىڭ بىرىندە كوكتوبەدە وتكىزىلىپ كەلە جاتقان فەستيۆال كورەرمەنگە دۇنيەجۇزىلىك دەڭگەيدەگى ونەر وردالارىنىڭ شىعارماشى­لىعىن جاقىن تانىستىراتىنىن اتاپ وتكەن ەدى.

«مەن بىرقاتار مەملەكەتتە تابيعات اياسىندا وتكىزىلگەن كونتسەرتتەردە ديريجەرلىك ەتتىم. تىنىق مۇحيتىنىڭ جاعالاۋىندا اۆستراليادا وتكەن سونداي ءبىر كەرەمەت كونتسەرت ءالى ەسىمدە. كوكتوبەدەگى فەستيۆال تىڭدارمانعا دۇنيەجۇزىلىك دەڭگەيدەگى ونەر ورداسىنىڭ شىعارماشىلىعىن جاقىن تانىستىرادى»، – دەدى الان بورىباەۆ.

فەستيۆال كەشكى ساعات 20.00-دە باستالادى.

Abai.kz