قازاقستان مەن قىتاي شەكاراسى شەكتەسىپ جاتقان، جاقىن كورشى ەل بولعانىمەن مۇلدە ەكى بولەك الەم. باسقا جاعىن ايتپاعاندا قازاقستان جەرى كەڭ، ادامى از بولسا، قىتاي كەرىسىنشە ميلليارد حالقىن قايدا سىيعىزارىن بىلمەي وتىرعان مەملەكەت.

ەكى ەلدىڭ ءبىر-بىرىنە دەگەن كوزعاراسى مەن تۇسىنىگى دە مۇلدە وزگەشە. بۇنى ەكى ەلدىڭ ءباسپاسوز بەتتەرىندە قارسى تاراپتى قالاي بەينەلەپ جازاتىنىنان انىق بايقاۋعا بولادى. ەلىمىزدەگى اقپارات قۇرالدارى قىتايدىڭ ءبىزدىڭ جەرىمىز مەن بايلىعىمىزعا كوز الارتا قاراپ وتىرعانىن اشىق جازادى. ەلىمىز حالقى دا شىعىستاعى كورشىمىز تۋرالى ءسوز بولسا كىرپىدەي جيىرىلادى.

ال قىتاي اقپارات قۇرالدارى كەرىسىنشە قازاقستاندى ءتىلى جەتكەنشە ماقتاپ، ءبىر كەسەك مايلى ەت رەتىندە سۋرەتتەپ، اۋىزدارىنىڭ سۋى قۇريدى. ولار وسىلاي ءوز جەرىنە سىيماي جاتقان ەلىن "باتىس شەكارامىزدا ءبىر باتپان قۇيرىق بار" دەپ قىزىقتىرا تۇسكىسى كەلەتىنى ءسوزسىز.

جاقىندا قىتايدىڭ ۇلكەن اقپارات اگەنتىكتەرىنىڭ ءبىرى sina.com سايتىندا بەلگىسىز اۆتوردىڭ ماقالاسى جاريالاندى. ماقالا تاقىرىبى: «قىتايلىق تۋريس جىگىتتەردىڭ قازاقستانعا ساياحاتتاۋىنىڭ باسقاشا سەبەبى» دەپ اتالادى. ايتپاعى، قىتاي جىگىتتەرىن ءبىزدىڭ ەلگە قىدىرىپ كەلۋگە قىزىقتىراتىن ەڭ ماڭىزدى سەبەپ — ادەمى قىزدارىمىز ەكەن.

قىتاي سايتىندا جاريالانعان سۋرەتتەر

ماقالادا قازاقستاندا ەر مەن ايەلدەر جان سانىنىڭ تەپە-تەڭدىگى ساقتالماعانى ايتىلادى.

ەر - از، ايەل - كوپ. ونىڭ ۇستىنە قىزدارى وتە سۇلۋ. سوندىقتان بۇل ەلدە ەرلەر «ەركەلەپ» ءجۇر. ءتىپتى، كەيبىر ەرلەر ايەلىنىڭ جۇمىس ىستەپ، وتباسىن اسىراۋىنا ۇيرەنىپ العان. سول ءۇشىن قىتاي جىگىتتەر بۇل ەلگە بارسا «قىزدار بازارىن» قىزدىراتىنى ءسوزسىز.

قازاقستاننىڭ قازىرگى دامۋى وتكەن عاسىردىڭ سەكسەنىنشى جىلدارىنداعى قىتايدى ەلەستەتەدى. بۇل ەلدىڭ جەراستى بايلىعى مول. دامۋ ورايى كوپ. قىتاي جىگىتتەرى ەڭبەكقور، ساۋدانىڭ جايىن جاقسى بىلەدى. قازاقستانعا بارسا ۇلكەن بولاشاق كۇتىپ تۇرعانى ءسوزسىز. ول ەلدە ءبىر جىگىت ءتورت ايەل الۋعا بولادى. دەمەك، بۇل جاعداي دا قىتاي جىگىتتەردى باتىستى بەتكە الۋعا جىگەرلەندىرۋى ءتيىس.

ەڭ ماڭىزدىسى، ەكى ەل جاقىن كورشى. مەملەكەتتىك بايلانىس جاقسى. ەكى ەلدىڭ بيلىگى جاقىن، دوستىق قاتىناستا. قازاقستانعا بارعان قىتايلىقتارعا ەشقانداي قيىندىق تۋمايدى.

مىنە، بىزگە بۇيىرعان «قۇدايى كورشىمىزدىڭ» كوزدەگەنى وسىنداي. ماقالا اۆتورىنىڭ بار ويى قىتايلىقتاردى بارىنشا قىزىقتىرىپ، قازاقستانعا تۇمسىعىنان جەتەلەپ الىپ كەلۋ ەكەنى كورىنىپ تۇر.

ءبىر ەسەپتەن، شەتەلدىكتەردىڭ ءبىزدىڭ ەلگە وسىنداي تۇسىنىكپەن قاراۋىنا وزىمىزدە سەبەپكەرمىز. ماسەلەن، «ەلىمىزدە ءبىر جىگىتكە جەتى قىزدان كەلەدى» دەپ ساندىراقتاپ جۇرگەندەر قانشاما. اقىلعا سىيمايتىن وسى ءسوز تالاي قىزدىڭ ءوزىن قور سەزىنۋىنە، اقىماقتاۋ جىگىتتەردىڭ «قىزتاڭداعىش» اۋىرۋعا شالدىعۋىنا سەبەپ بولدى. ورايى كەلگەندە ايتا كەتەيىك، ستاتيستيكا كوميتەتىنىڭ مالىمەتى بويىنشا ەلىمىزدە قازىرگى تاڭدا ەرلەر سانى 8 865 101, ايەلدەر 9 439 397 ادام. دەمەك، پارىق اناۋ ايتقانداي الشاق ەمەس.

ەكىنشىدەن، ەلىمىز بيلىگىنىڭ شەتەلدىك كاسىپكەرلەر مەن تۋريستەردى قۇشاق اشا قارسى الاتىن ۇستانىمى ولاردى ەسىرتىپ جىبەرگەنى شىندىق. قازاقستاندا تەك قازاقتىڭ عانا قۇقىعى تاپتالاتىن، ال قالعان ۇلت پەن حالىقتىڭ قۇرمەتكە بولەنەتىنى جاسىرىن ەمەس. وسىنى ءبىلىپ العان قىتايلار دا ءوز ازاماتتارىنىڭ قازاقستانعا كەلسە جامان بولماسىن ءبىلىپ وتىر.

نۇرا ماتاي

Abai.kz