ساۋلەنىڭ جانپەيىسوۆانىڭ انشىلىگىنە اڭگىمە جوق قوي. تولەگەن اعامنىڭ «اق جاڭبىرلارىنا»، مارالتايدىڭ «الاتاۋىنا» جازعان انىنەن كەيىن كومپوزيتورلىعىنا دا دەن قويعام. ەندى ساۋلەنىڭ ءوزىم بايقاعان باسقا ءبىر قىرى تۋرالى ايتقىم كەلىپ تۇر.

بىلتىر تولەگەن ايبەرگەنوۆتىڭ 80 جىلدىق مەرەيتويىن اتاپ ءوتۋ ءۇشىن ماسكەۋگە باردىق. جوسپارلانعان شارالار بىتكەننەن كەيىن ءبىز ەلگە قايتۋعا قامداندىق، ساۋلە ەسسەنتۋكيگە اتتاناتىن بولدى. ءبىزدىڭ ۇشاعىمىز كەشكە ەدى، ال ونىڭ ۋاقىتى تىم از. الماتىدان اتتاناردا ءبىر جۋرناليست ءدارى الا كەلىڭىز دەپ قولقا سالعان ەكەن. تەك قانا ماسكەۋدەن تابىلاتىن ءدارى. كەلگەلى بەرى سونى ينتەرنەت ارقىلى ىزدەگەن ول اقىرى تاپتى.

ەندى بارىپ السا، ۇشاقتان كەشىگۋى مۇمكىن. اۋەلى «مۇمكىن، سەن الارسىڭ...» دەپ ماعان قاراعان. مەن كەلىسىپ ەدىم. بىراق ساۋلە اينىپ قالدى. «جوق، ءوزىم بارىپ الۋىم كەرەك. امانات قوي...».

اقىرى شىعارىپ سالۋشىلاردى ويبايلاتىپ ءجۇرىپ، دارىحاناعا سوعىپ، الىپ، تولەگەن اعامنىڭ قىزدارىنىڭ قولىنا ۇستاتقاننان كەيىن عانا كوڭىلى كونشىدى. الماتىعا حابارلاسىپ، ءدارىنى كىمنەن الاتىنىن ەسكەرتكەننەن سوڭ عانا اۋەجايعا بەت الدى. اماناتقا ادالدىق، ۋادەگە بەرىكتىك دەگەن جاقسى قاسيەت قوي، بۇرىن دا سىيلاۋشى ەدىم، ەندى ءتىپتى قاتتى جاقسى كورىپ كەتتىم.

باۋىرجان باباجانۇلىنىڭ Facebook-تەگى پاراقشاسىنان

Abai.kz