اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى احمەتقالي مولداعاليەۆ "مۇناي ۇرلاۋمەن اينالىسقان قىلمىستىق توپ باسشىسى" دەلىنگەن ەركىن ءىزباساردى 12 جىلعا باس بوستاندىعىنان ايىرۋ جانە مۇلكىن تاركىلەۋ جازاسىن كەستى.
ەركىن ءىزباساردىڭ سەنىمدى سەرىگى دەپ سيپاتتالعان اۋحات قاليەۆكە 11 جىلعا باس بوستاندىعىنان ايىرۋ جانە مۇلكىن تاركىلەۋ جازاسى كەسىلدى.
سوتتالۋشىلار اراسىندا وبلىستىق ىشكى ىستەر دەپارتامەنتى باسشىسىنىڭ بۇرىنعى ورىنباسارى راحات احانوۆ تا بار. سوت ونى 5 جىل ءۇش اي باس بوستاندىعىنان، پولكوۆنيك شەنىنەن جانە ءومىر بويى قۇقىق قورعاۋ سالاسىندا ەڭبەك ەتۋ قۇقىنان ايىرۋعا ۇكىم كەستى.
ءبىر سوتتالۋشى قىلمىس جاسالۋ مەرزىمىنىڭ ءوتىپ كەتۋىنە بايلانىستى قىلمىستىق جاۋاپكەرشىلىكتەن بوساتىلدى. تاعى ءبىر سوتتالۋشى ەكى جىلعا باس بوستاندىعى شەكتەلىپ، راقىمشىلىقپەن بوسادى.
قالعان 21 ادام 3 جىلدان 11 جىلعا دەيىنگى مەرزىمگە سوتتالدى. كەيبىر سوتتالۋشىلارعا راقىمشىلىق جاسالىپ، جازا مەرزىمى ءبىر جىلدان ەكى جىلعا دەيىن ازايتىلدى.
ەركىن ءىزباساردىڭ ادۆوكاتى ءمادي مىرزاعاراەۆ سوت ۇكىمى "تىم قاتاڭ" ەكەنىن ايتىپ، اپەللياتسيالىق شاعىم تۇسىرەتىنىن مالىمدەدى.
ەركىن ءىزباسار مەن ونىڭ سەرىكتەرىنە تاعىلىپ وتىرعان ۇلكەن ايىپ – مۇناي ۇرلىعى. سوت ماتەريالدارى بويىنشا، ولار "ساعىز پەترولەۋم" كومپانياسىنا قاراستى "قاعاناي" كەنىشىنەن 2015 جىلعى ماۋسىم-قىركۇيەك ارالىعىندا 530 توننا مۇناي ۇرلاعان. ۇرلانعان مۇناي قۇنى 11 ميلليون 302 مىڭ تەڭگە ەكەندىگى ايتىلادى. ودان بولەك، بايعانين اۋدانىنداعى "اششىكول", مۇعالجار اۋدانىنداعى "سينەلنيكوۆسكوە" كەنىشى مەن بايعانين اۋدانىنداعى "قاراتوبە" كەنىشىنەن دە ءار جىلدارى اسا كوپ مولشەردە مۇناي ۇرلانعان.
"قىلمىستىق توپقا جەتەكشىلىك ەتكەن" ءبىرىنشى توپ مۇگەدەگى ەركىن ءىزباسار بۇرىن دا سوتتالعان. ول العاش رەت 2003 جىلعى ناۋرىزدا "بوپسالاۋ" ايىبى بويىنشا سوتتالىپ، جەتى جىلعا باس بوستاندىعىنان ايىرىلعان. ءبىر جىلدان سوڭ بوستاندىققا شىققان. ال 2008 جىلعى ءساۋىر ايىندا ىزباسارعا قىلمىستىق كودەكستىڭ "ۇيىمداسقان قىلمىستىق توپ قۇرۋ جانە وعان جەتەكشىلىك ەتۋ", "زاڭسىز قارۋ، وق-ءدارى ساقتاۋ، تاسىمالداۋ جانە وزىمەن الىپ ءجۇرۋ", سونىمەن بىرگە "زاڭسىز ەسىرتكى ساقتاۋ، ساتىپ الۋ، ساتۋ جانە تاسىمالداۋ" بابى بويىنشا ايىپتار تاعىلعان. سوت ۇكىمىمەن ءۇش جىلعا باس بوستاندىعىنان ايرىلعان ەركىن ءىزباسار 2010 جىلعى قاڭتاردا مەرزىمىنەن بۇرىن بوستاندىققا شىققان. ال بۇل جولى تەرگەۋ ونى قىلمىستىق كودەكستىڭ 13 ءتۇرلى بابى بويىنشا ايىپ تاقتى.
Abai.kz
