قوستاناي وبلىسىنىڭ اكىمى ارحيمەد مۇحامبەتوۆ ءبىلىم باسقارماسىنىڭ جەتىم بالالاردى ۇيمەن قامتاماسىز ەتۋ بويىنشا اتقارىپ جاتقان جۇمىستارىن سىنعا الدى، دەپ حابارلايدى قازاقپارات ءتىلشىسى.

مەكەمەدە ءمالىم ەتكەندەي، وبلىستا جەتىم بالالاردىڭ جاعدايىن جاقسارتۋ بويىنشا جۇيەلى جۇمىس اتقارىلۋدا. سونداي-اق، اتا-انا قامقورلىعىنسىز قالعان بالالاردىڭ جالپى سانىنىڭ ازايعانى بايقالادى.

«وبلىستا جالپى 2296 جەتىم بالا بار. ونىڭ 67 پايىزى وتباسىلاردا تۇرىپ جاتىر. 33,5 پايىزى نەمەسە 761 بالا 14 بالالار ۇيىندە جانە ينتەرناتتىق ۇيىمداردا تۇرادى. وسىلايشا، اۋدان مەن قالانىڭ 20 ءبىلىم ءبولىمىنىڭ ەسەبىندە اتا-اناسىز قالىپ، قامقورلىق پەن قورعانشىلىققا بەرىلگەن 1359 جەتىم بالا بار. 175 بالا - پاتروناتتىق تاربيەدە»، - دەدى وبلىستىق ءبىلىم باسقارماسىنىڭ باسشىسى ءباتيما داۋموۆا اپپاراتتىق كەڭەستىڭ وتىرىسىندا.

قوستاناي وبلىسىندا سوڭعى 7 جىل ىشىندە جەتىم جانە اتا-انا قامقورلىعىنسىز بالالارعا ارنالعان ۇيىمدار سانى 4 بىرلىككە قىسقارعان. 2018 جىلدىڭ وتكەن مەرزىمى ىشىندە عانا اتالعان مەكەمەلەردەن 94 بالا شىعارىلعان.

«اتقارعان جۇمىستىڭ ناتيجەسى رەتىندە 2017 جىلى فەدوروۆ بالالار ءۇيى مەن بيىلعى قوستاناي وبلىستىق بالالار ءۇيىنىڭ جابىلۋىن كەلتىرە الامىز. 5 جىلدىڭ ىشىندە 366 بالا وتباسىلى بولىپ، 778 بالا تۋعان ۇيىنە قايتارىلدى، قازاقستاندىق ازاماتتار 320 بالانى اسىراپ الدى» - دەدى ب. داۋموۆا.

ءوڭىر اكىمى ارحيمەد مۇحامبەتوۆ اتالمىش جۇمىستاردى وبلىستىڭ وزگە دە اۋداندارى مەن وبلىستارىندا جالعاستىرۋ كەرەك ەكەنىن ەرەكشە ايتىپ ءوتتى.

وبلىستىق ءبىلىم باسقارماسىنىڭ باسشىسى ب. داۋموۆا كەڭەس وتىرىسىندا ءسوز سويلەۋ كەزىندە بالالار ۇيىنەن كەتكەن تاربيەلەنۋشىلەردىڭ الداعى تاعدىرى، اسىرەسە ولاردى باسپانامەن قامتاماسىز ەتۋ ماسەلەسىنە توقتالماعان. بۇل ماسەلەگە قاتىستى ارحيمەد مۇحامبەتوۆ ەسكەرتۋ جاسادى.

«قوستانايدا العاشقى جارتىجىلدىقتا 35 جەتىم بالا ۇيمەن قامتىلۋى كەرەك ەدى. سىزدەر سلايدتا ءنول دەپ كورسەتىپسىزدەر. استانا كۇنىنە وراي بەرىلگەن پاتەرلەردى ەسكەردىڭىزدەر مە؟ ولاردىڭ قاتارىندا جەتىم بالالار دا بولعان. ولار نەگە ەلەۋسىز قالدى؟ مەكەمە قىزمەتى تىم تومەن»، - دەدى اكىم.

وسىعان بايلانىستى، ارحيمەد مۇحامبەتوۆ الەۋمەتتىك ماسەلەلەر جونىندەگى ورىنباسارى مارات جاندۋباەۆقا اتالمىش ماسەلە بويىنشا كەڭەس وتكىزۋدى تاپسىردى.

Abai.kz