اقش-تىڭ World Champions Olympic بايقاۋىنا قاتىسىپ، التىن مەدالعا يە بولعان «باستاۋ» دومبىراشىلار توبى استاناعا كەلىپ، مادەنيەت جانە سپورت ءمينيسترىنىڭ قابىلداۋىندا بولدى.

«ءبىز بۇگىن قازاق ونەرى اسقاقتاعان تاماشا ءساتتىڭ كۋاسى بولىپ وتىرمىز. 20 ارنولد شۆارتسنەگگەر قۇرىلتايشى بولىپ سانالاتىن، جىلدان استام ۋاقىت بويى ۇيىمداستىرىلىپ كەلە جاتقان بەدەلدى بايقاۋدا ۇزدىك اتانىپ كەلۋلەرىڭىزبەن قۇتتىقتايمىن!»، - دەدى ارىستانبەك مۇحامەديۇلى دومبىراشىلاردى قابىلداۋدا. ونەرپازدار بۇعان دەيىن دە لاتۆيادا وتكەن «ۆوسحودياششيە زۆەزدى» بايقاۋىندا جانە يزرايلدە وتكەن «World of music» سايىسىندا باس جۇلدەمەن ماراپاتتالعان.

توپ مۇشەلەرى تەمىرلان ولجاباي مەن ەرنات ناۋرىز - قازاق ۇلتتىق ونەر ۋنيۆەرسيتەتىنىڭ ستۋدەنتتەرى. وتكەن جىلى قازاقستاندىق ديماش قۇدايبەرگەن «I am singer» جوباسىنا قاتىسىپ، «دايديداۋ» ءانىن شىرقاعاندا ءدال وسى بالالار دومبىرامەن سۇيەمەلدەگەن. «قازاق ۇلتتىق ونەر ۋنيۆەرسيتەتىندە ەرنات ەكەۋمىز دومبىرا شەرتەتىنبىز. 2017 جىلى قىتايدىڭ شانشا قالاسىنا ديماشتىڭ كونتسەرتىنە باردىق جانە ءوزىمىزدىڭ توپتى قۇرۋدى ۇيعاردىق. سول جىلى 27 ماۋسىمدا ديماشتىڭ كونتسەرتىندە توپتىڭ تۇساۋى كەسىلگەن بولاتىن. ءبىر جىلدا ءۇش ۇلكەن حالىقارالىق كونكۋرستىڭ باس جۇلدەسىن يەلەندىك. بايقاۋدان سوڭ، شەتەلدىكتەر بىزگە جاقىنداپ، دومبىرانىڭ نەشە ىشەگى بار دەپ قىزىعۋشىلىق ءبىلدىرىپ جاتتى.

ەكى ىشەك دەگەنىمىزدە تاڭ قالاتىن.  دومبىرانىڭ دىبىسىن گولليۆۋدتىق ساۋندترەكتەرگە قوسۋ تۋرالى ۇسىنىستار ءتۇستى. ەندى ءبارى بولاشاقتىڭ ەنشىسىندە»، - دەدى تەمىرلان ولجاباي جۋرناليستەرگە بەرگەن سۇحباتىندا. ايتا كەتەيىك، World Championship of Performing Arts (WCOPA) - حالىقارالىق تالانتتار وليمپياداسى. دەڭگەيى جاعىنان WCOPA دۇنيەجۇزىلىك وليمپيادا ويىندارىمەن تەڭ. الەمدىك شوۋ-بيزنەستىڭ استاناسى لوس-اندجەلەستە وسىمەن 22 رەت ۇيىمداستىرىلعان وليمپيادادا 72 مەملەكەتتىڭ وكىلدەرى  باق تالاستىردى. قازاقستاندىق ونەرپازدار بۇل بايقاۋعا العاش رەت قاتىسىپ، باس جۇلدەنى يەلەندى.

Abai.kz