ءسپيرتتى سۋسىندارمەن كۇرەس 5 شىلدەدە "تۇركىمەنستاندا 2018-2024 جىلدارعا ارنالعان الكوگولدىڭ زياندى اسەرىمەن كۇرەس" ۇلتتىق باعدارلاماسى قابىلدانعاننان كەيىن جۇزەگە اسا باستاعان.
اشحابادتاعى شولۋشى امانمىرات بۋگاەۆتىڭ حابارلاۋىنشا، بىرنەشە دۇكەننىڭ يەلەرى ءسپيرتتى سۋسىنداردى تاركىلەيتىنىن ايتقان.
"مەن 10 شىلدەدە استاناداعى "مير" بازارى جانىنداعى دۇكەندە الكوگول ونىمدەرىن قالاي تاركىلەپ جاتقانىنىڭ كۋاسى بولدىم. ارنايى جۇمىسشىلار كەلىپ، جۇكتىڭ ءبارى كولىككە تيەپ جاتتى. دۇكەن يەلەرىنە پوليتسيا دەپارتامەنتىنە بارۋدى نۇسقاپ جاتتىر", - دەيدى امانمىرات بۋگاەۆ.
"تۇركىمەنستان حرونيكاسى" باسىلىمى دا دەرەككوزىنە سىلتەمە جاساپ، كۇش قۇرىلىمدارىنىڭ بارلىق ساۋدا دۇكەندەرىن تەكسەرىپ جاتقانىن جازعان.
ال ازاتلىك ءتىلشىسىنىڭ حابارلاۋىنشا، تۇركىمەنستاندا سوڭعى ۋاقىتتا ءسپيرتتى سۋسىنداردان ۋلانۋ وقيعاسى كوبەيگەن. اسىرەسە داشوگۋز، لەباپ جانە مارى ايماقتارىندا ءجيى تىركەلگەن. "ەلگە مەتيل ءسپيرتىن اكەلگەن سەكىلدى. ونى ەتيل سپيرتىمەن ارالاستىرۋى مۇمكىن. ناتيجەسىندە كوپ ادام ۋلانعان، ءتىپتى كىسى ءولىمى بولعانى دا ايتىلادى. سول سەبەپتەن بيلىك ءسپيرتتى سۋسىنداردى جاپپاي تاركىلەپ جاتۋى مۇمكىن", - دەيدى ازاتلىك ءتىلشىسى دەرەككوزىنە سىلتەمە جاساپ.
Abai.kz
