پارلامەنت سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ حاتشىسى تولەۋبەك مۇقاشەۆ پولشا پارلامەنتاريزمىنىڭ 550 جىلدىعىنا جانە پولشا تاۋەلسىزدىگىنىڭ قالپىنا كەلۋىنىڭ 100 جىلدىعىنا ارنالعان سالتاناتتى شارالارعا قاتىسۋدا.

سەناتور 13 شىلدەدە پولشا پارلامەنتىندەگى مەرەيتوي كۇنىنە ارنالعان سالتاناتتى وتىرىسقا قاتىستى.

ۆارشاۆاعا ساپار اياسىندا پولشا پارلامەنتى قوس پالاتاسىنىڭ توراعالارىمەن كەزدەسۋ بولدى. ت. مۇقاشەۆ قازاقستان پارلامەنتى سەناتىنىڭ توراعاسى قاسىم-جومارت توقاەۆتىڭ اتىنان پولشا سەناتىنىڭ مارشالى ستانيسلاۆ كارچەۆسكيدى وسى ەلدىڭ تاريحىنداعى ماڭىزدى داتامەن قۇتتىقتادى. اڭگىمە بارىسىندا ەكى ەلدىڭ زاڭ شىعارۋ ورگاندارىنىڭ ءوزارا ءىس-قيمىلىنىڭ كەلەشەگى تۋرالى ايتىلدى. سونداي-اق س. كارچەۆسكيدىڭ 2016 جىلى قازاقستانعا ساپارى بارىسىندا قول جەتكەن ۋاعدالاستىقتارىن ىسكە اسىرۋ بارىسى دا تالقىلاندى.

سەناتور ت. مۇقاشەۆ پەن پولشا سەناتىنىڭ ۆيتسە-سپيكەرى ماريا كوتس ەكىجاقتى ىنتىماقتاستىقتىڭ اۋقىمدى ماسەلەلەرى تۋرالى پىكىر الماستى. جۇزدەسۋشىلەر ەكى ەلدىڭ جوعارى دەڭگەيدەگى ساياسي جانە ەكونوميكالىق ءوزارا ءىس-قيمىلى مەن پارلامەنتارالىق ۇنقاتىسۋدىڭ قارقىندى سيپاتىن اتاپ ءوتتى. قازاقستان دەلەگاتسياسىنىڭ باسشىسى ءبىزدىڭ ەلىمىزدىڭ قوعامدىق-ساياسي جانە ەكونوميكالىق ومىرىنە پولياك دياسپوراسىنىڭ بەلسەندى قاتىسىپ كەلە جاتقانى تۋرالى ايتتى. سەناتوردىڭ ايتۋىنشا، قازاقستاندا پولياك ءتىلىن، مادەنيەتى مەن داستۇرلەرىن دامىتۋ جانە وزدەرىنىڭ تاريحي وتاندارىمەن بايلانىستارىن نىعايتۋ ءۇشىن بارلىق جاعداي جاسالعان. ت. مۇقاشەۆ قازاقستان سەناتىنىڭ توراعاسى ق.توقاەۆتىڭ قۇتتىقتاۋ حاتىن م. كوتسقا تابىس ەتتى.

ت. مۇقاشەۆ سونداي-اق پولشا سەيمى توراعاسىنىڭ ورىنباسارى رىشارد تەرلەتسكيمەن دە اڭگىمەلەستى.

شاراعا قازاقستاننىڭ ۆارشاۆاداعى ەلشىسى مارعۇلان بايمۇقان قاتىستى.

Abai.kz