«اباي-اقپارات» قازاق ينتەرنەت كەڭىستىگىن دامىتۋ قورى» قوعامدىق قورى قۇرىلتايشىلارىنىڭ شەشىمىمەن بۇرىنعى رەداكتور داۋرەن قۋاتتىڭ باسقا قىزمەتكە اۋىسۋىنا بايلانىستى Abai.kz اقپاراتتىق پورتالىنىڭ باس رەداكتورى بولىپ جازۋشى-جۋرناليست قانات ابىلقايىر تاعايىندالدى، - دەپ حابارلايدى اباي-اقپارات.

قانات ابىلقايىر - 1986 جىلى الماتى وبلىسىنىڭ رايىمبەك اۋدانىنا قاراستى سۇمبە اۋىلىندا دۇنيەگە كەلگەن. 2008 جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن تامامداعان.

حالىقارالىق "قازاقستان ZAMAN", رەسپۋبليكالىق "انا ءتىلى", "جاس قازاق", "الاش ايناسى", "جۇلدىزدار وتباسى" سەكىلدى باسىلىمداردا جۋرناليست، ءبولىم  رەداكتورى، باس رەداكتوردىڭ ورىنباسارى سەكىلدى قىزمەتتەر اتقارعان. سوڭعى جىلداردا Abai.kz اقپاراتتىق پورتالىنىڭ شەف-رەداكتورى بولدى.

"تەكەس تەرىس اعادى", "كورشىنىڭ قىزى" اتتى كىتاپتاردىڭ اۆتورى، پروزا اتالىمى بويىنشا حالىقارالىق "شابىت" فەستيۆالىنىڭ گران-پري يەگەرى.

قازاقستان جازۋشىلار جانە جۋرناليستەر وداعىنىڭ مۇشەسى.

سونداي-اق، بۇگىننەن باستاپ، Abai.kz اقپاراتتىق پورتالى رەداكتورىنىڭ ورىنباسارى بولىپ بەلگىلى جۋرناليست، "اقپارات سالاسىنىڭ ۇزدىگى" نۇرگەلدى ابدىعانيۇلى قىزمەتكە كىرىستى.

قىزمەتكەرلەرىمىزگە شىعارماشىلىق تابىس تىلەيمىز.

Abai.kz اقپاراتتىق پورتالى