اۋىل شارۋاشىلىعى مينيسترلىگىنىڭ ۆەتەرينارلى باقىلاۋ جانە قاداعالاۋ كوميتەتىنىڭ توراعاسى ارمان وتەعۇلوۆ قازىرگى جاعداي ءجىتى تەكسەرىلىپ جاتىر دەيدى. سوڭعى مالىمەتتەر بويىنشا، قىرعىزستاندا كۇيدىرگى ىندەتىن جۇقتىردى دەگەن كۇدىكپەن 11 ادام اۋرۋحاناعا جاتقىزىلعان.

"قىرعىزستاننان ءتىرى قارا مال اكەلىنبەيدى. ەت ونىمدەرىن نارىققا جەتكىزەتىن ارنايى كاسىپورىن بار. ءبىز 11 ادامنىڭ اۋىرىپ، اۋرۋحانادا جاتقانىن بىلەمىز. قىرعىز ارىپتەستەرمەن بىرلەسىپ جۇمىس ىستەپ، ماسەلەنى شەشەمىز", – دەدى وتەعۇلوۆ.

"اسا قاۋىپ جوق. ەڭ الدىمەن اۋرۋدىڭ كوزىن ىزدەۋ كەرەك، قالاي پايدا بولعانىن انىقتاپ، سوسىن بارىپ ناقتى شەشىم قابىلداۋعا بولادى", – دەدى كوميتەت توراعاسى.

25 ماۋسىمدا قىرعىزستاننىڭ بازار-كورگون اۋدانى، جانى-اكمان اۋىلىنىڭ تۇرعىنى دارىگەرلىك كومەككە جۇگىنگەن. ونى كۇيدىرگى ىندەتىن جۇقتىرۋى مۇمكىن دەگەن كۇدىكپەن اۋرۋحاناعا جاتقىزعان. بۇگىنگى كۇنى ەمحانادا مالدى سويىپ، بولۋگە قاتىسقان 11 ادام جاتىر.

Abai.kz