الماتى وبلىسىنىڭ باسشىلىعى شۋ شىققان قاپشاعايداعى «التىن الما» جانە «الما سيتي» ويىنحانالارىنىڭ جۇمىسشىلارىمەن كەزدەستى، - دەپ حابارلايدى مەنشىكتى ءتىلشىمىز.

2018 جىلدىڭ 12 ماۋسىم كۇنى قاپشاعاي قالاسىنىڭ اكىمدىگىنە،  الماتى وبلىسى قاپشاعاي قالاسىندا ورنالاسقان («Penson Group» جانە «The Alma City» جشس-تەرى) جۇمىسشىلارىنان اشتىق جاريالايتىنى تۋرالى حات كەلىپ تۇسكەن.

اقپارات تۇسكەن كۇننەن باستاپ وبلىس اكىمدىگىمەن ناقتى شارالار قابىلداندى. اتاپ ايتقاندا، وبلىس اكىمىنىڭ ورىنباسارى جاقسىلىق ومار باستاعان مۇددەلى مەملەكەتتىك مەكەمەلەرىنىڭ باسشىلارى ويىنحانالاردىڭ جۇمىسشىلارىمەن كەزدەسىپ، ورىن العان ماسەلەگە قاتىستى جاعدايدى قالىپقا كەلتىرۋ ماقساتىندا جۇمىستار جۇرگىزدى.

كەزدەسۋ بارىسىندا، ويىنحانالاردا بارلىعى 420 ادام جۇمىس ىستەيتىنى انىقتالدى. قىزمەتكەرلەردىڭ ايتۋلارى بويىنشا ولاردىڭ بەيرەسمي ەڭبەكاقىلارى 120-400 مىڭ تەڭگە كولەمىندە بولعان. ويىنحانا باسشىلارى  جۇمىسشىلارعا ەڭبەك اقىنى رەسمي بۋحگالتەريا بويىنشا 40-50 مىڭ تەڭگە شاماسىندا، قالعان قاراجاتتى كونۆەرتكە سالىپ تولەگەنى انىقتالدى. ولاردىڭ ىشىندە، جالاقىسىن بەيرەسمي قوسىمشا كونۆەرتتە الاتىن 260 ادام. ويىنحانالاردىڭ وسى ازاماتتارعا بەرەشەگى شامامەن 130 ملن.تەڭگەنى قۇراپ وتىر.

«مەن كازينودا جەتى جىل جۇمىس ىستەپ ءجۇرمىن. 2015 جىلدان بەرى ديرەكتورلار ءجيى وزگەرىپ، جالاقى تولەۋگە بايلانىستى ماسەلەلەر باستالدى. كازينوعا قارىز اقشامىزدى سۇراپ كەلگەنىمىزدە باسشىلىق بىزدەن سالىق تەكسەرىسى ءجۇرىپ جاتقاندىعىن حابارلاپ، ءبىزدى كىرگىزبەي، بۇل جەردەن كەتۋىمىزدى تالاپ ەتتى.  جۇمىسشىلاردىڭ ۇلكەن توبى جينالعاندا، بارلىعىمىز عيمارات ىشىنە كىرىپ كەتتىك. ءبىزدىڭ اقشامىزدى بەرمەيىنشە، بۇل جەردەن كەتپەيمىز»، - دەدى فاريدا سەيداليموۆا.

قالىپتاسقان جاعدايعا بايلانىستى 2018 جىلدىڭ 14 ماۋسىم كۇنى تالدىقورعان قالاسىندا قۇقىق قورعاۋ سالاسىنىڭ، مەملەكەتتىك ۇيىمدارىنىڭ، وڭىرلىك كاسىپكەرلەر پالاتاسى، وبلىستىق كاسىپوداق ۇيىمىنىڭ باسشىلارىنىڭ جانە دە «Penson Group» جانە «The Alma City» جشس قۇرىلتايشىلارىنىڭ سەنىمدى وكىلدەرىمەن اشتىق جاريالاعان توپتىڭ بەلسەندى مۇشەلەرىنىڭ قاتىسۋىمەن وبلىستىق داعدارىسقا قارسى شتابتىڭ كەزەكتەس تىس  وتىرىسى وتكىزىلدى.

شتاب وتىرىسى بارىسىندا، ويىنحانا قۇرىلتايشىلارى 2018 جىلدىڭ 15 ماۋسىم كۇنى ويىنحانا قىزمەتكەرلەرىنە باستاپقى 10 ملن.تەنگە جالاقى قارىزدارىن تولەۋ جونىندە مىندەتتەمە الدى. قاپشاعاي قالاسىنىڭ اكىمىنە 14 ماۋسىم كۇنى ويىنحانالاردىڭ قۇرىلتايشىلارىمەن كەزدەسىپ جۇمىسشىلاردىڭ قالعان قارىزىن قىسقا مەرزىم ىشىندە تولەپ بەرۋ ماقساتىنداعى ناقتى شەشىمدەر قابىلداۋ تۋرالى جانە اتالعان جاعدايدى مىسالعا كەلتىرە وتىرىپ قالعان ويىنحانا قىزمەتكەرلەرىنە ەڭبەك شارتىنا وتىرۋعا ءتۇسىندىرۋ جۇمىستارىن جۇرگىزۋگە تاپسىرما بەرىلدى.

"كازينو ەكى بۋحگالتەريا جۇرگىزگەن. ياعني، قوسىمشا تابىستى جاسىرىپ وتىرعان. تەكسەرىستى ءارى قاراي جۇرگىزەمىز. قانشا اقشانى جاسىرىپ ۇلگەردى، ودان بيۋدجەتكە قانداي شىعىن كەلدى ءبارىن انىقتايمىز", - دەيدى الماتى وبلىسى ەڭبەك ينسپەكتسياسىنىڭ باسقارما جەتەكشىسى كەرىمبەك جانشاباي.

سونىمەن قاتار، وتىرىس قورىتىندىسى بويىنشا تومەندەگىدەي تاپسىرمالار بەرىلدى:

- الماتى وبلىسىنىڭ ەڭبەك ينسپەكتسياسى بويىنشا باسقارماسىنا جۇمىسشىلار تاراپىنان ايتىلعان زاڭعا قايشى فاكتىلەر بويىنشا زاڭعا سايكەس تەكسەرۋلەر ۇيىمداستىرۋ;

- مەملەكەتتىك كىرىستەر دەپارتامەنتىنە بەلگىلى بولعان جاسىرىن بۋحگالتەريا مەن سالىقتان جالتارۋ فاكتىلەرى بويىنشا زاڭعا سايكەس تەكسەرۋ جۇمىستارىن ۇيىمداستىرۋ;

- قۇقىق قورعاۋ ورگاندارىنا (وبلىستىق پروكۋراتۋرا، ءىىد، ۇقك) جاعدايدىڭ  ۋشىعىپ كەتۋىنە جول بەرمەۋ ماقساتىنداعى جۇمىستاردى زاڭعا سايكەس ۇيىمداستىرۋ تاپسىرىلدى.

وتىرىس ناتيجەسى بويىنشا ىنتالى توپ مۇشەلەرىمەن اشتىقتى توقتاتۋ تۋرالى كەلىسىمگە قول جەتكىزىلدى. اتالعان جاعداي وبلىس اكىمدىگىنىڭ تۇراقتى باقىلاۋىندا.

Abai.kz