WBC, WBA (Super) جانە IBO تۇجىرىمدارى بويىنشا ورتا سالماقتا الەم چەمپيونى قازاقستاندىق گەننادي گولوۆكين مەن مەكسيكالىق ساۋل "كانەلو" الۆارەس ەكىنشى جەكپە-جەگى جايلى كەلىستى، - دەپ حابارلايدى Vesti.kz.

الۆارەستىڭ مۇددەسىن قورعايتىن پروموۋتەر وسكار دە لا حويانىڭ ايتۋىنشا، كەزدەسۋ 15 قىركۇيەكتە وتەدى. بۇل كۇن - مەكسيكانىڭ تاۋەلسىزدىك كۇنىنىڭ ۋيك-ەندى.

"كەزدەسۋدىڭ 15 قىركۇيەكتە وتەتىنىن اسا قۋانىشپەن جاريا ەتەمىن، #CaneloGGG2", - دەپ جازدى وسكار دە لا حويا  Twitter جەلىسىندە.

ايتا كەتەيىك، گولوۆكين مەن الۆارەستىڭ قورىتىندى كەلىسسوزدەرى رەسمي جاريالانىمعا ءبىر جارىم ساعات قالعاندا وتكەن. باستاپقىدا وسكار دە لا حويا ESPN باسىلىمىنا بەرگەن سۇحباتىندا "ەكىنشى كەزدەسۋ وتپەيدى، بۇل 100 پايىز" دەپ مالىمدەگەن. الايدا بەس مينۋت وتكەندە تاراپتار قايتا تالقىلاۋعا كوشكەن.

ال ودان ءبىر تاۋلىك بۇرىن مەكسيكالىق ساۋل "كانەلو" الۆارەستىڭ ءىسىن جۇرگىزەتىن Golden Boy Promotions پروموۋتەرلىك كومپانياسىنىڭ پرەزيدەنتى ەريك گومەس قازاقستاندىق گەننادي گولوۆكينگە ۋلتيماتۋم قويعان. گومەستىڭ سوزىنشە، ولار گولوۆكينگە قىركۇيەكتە بولۋى مۇمكىن قارىمتانىڭ كىرىسىن ءبولىسۋ تۋرالى سوڭعى ۇسىنىستارىن ايتقان. ول شارت بويىنشا تابىس الۆارەستىڭ پايداسىنا 57,5-تە 42,5 بولىپ بولىنەدى.

ەسكە سالايىق، گولوۆكين مەن "كانەلو" اراسىنداعى العاشقى جەكپە-جەك بىلتىر 16 قىركۇيەكتە T-Mobile ارنەاسىندا ءوتىپ، تورەشىلەر شەشىمى بويىنشا تەڭ اياقتالعان. ول كەزدە قازاقستاندىق تۇسكەن تابىستىڭ 30 پايىزىن عانا العان.

Abai.kz