«نۇر وتان» پارتياسى توراعاسىنىڭ

ءبىرىنشى ورىنباسارى

م.س.اشىمباەۆقا

قر ىشكى ىستەر ءمينيسترى

ق.قاسىموۆقا

قر سىرتقى ىستەر ءمينيسترى

ق.ابدراحمانوۆقا

مەنىڭ كۇيەۋىم بيحان قانات (1981 جىلدىڭ 28 ماۋسىمىندا تۋعان) بۇل كۇندەرى قىتايدىڭ شىڭجاڭ ولكەسىنىڭ قابا اۋدانىندا ءجۇر. قازىرگە ونىڭ قازاقستانعا قايتۋى مۇڭ بولىپ تۇر. مەن ەكى بالاممەن  شقو-نىڭ ۇلان اۋدانىندا تۇرىپ جاتىرمىن.

شىتىرمان وقيعالى اڭگىمەنى باسىنان باستايىن.

مەن بيحان قاناتپەن 2008 جىلى 24 قاڭتاردا قابا اۋدانىندا زاڭدى نەكەگە تۇرىپ، كۇيەۋگە شىقتىم. ۇلكەن قىزىم قانات جىبەك سول جىلى 19 قازاندا دۇنيەگە كەلدى.

قايىن اتام ەسكەندىر بيحان وتباسىمەن 2008 جىلى ناۋرىز ايىندا قازاقستانعا كوشىپ كەلىپ، شقو-نىڭ ۇلان اۋدانى، گاگارين اۋىلىنا قونىستاندى.

كۇيەۋىم بيحان قانات 2008 جىلى 6 قىركۇيەكتە قىتايدان شەكارا بۇزدى دەگەن ايىپپەن شقو-نىڭ گلۋبوكوە اۋدانىندا ۇستالادى. 2008 جىلى 1 جەلتوقساندا قىلمىستىق جاۋاپكەرشىلىككە تارتىلىپ، 6 ايعا باس بوستاندىعىنان ايىرىلدى. جازاسىن جالپى رەجىمدەگى تۇزەتۋ كولونياسىندا وتەدى.

قانات جازاسىن وتەپ شىققان سوڭ، 2009 جىلدىڭ قاراشا ايىندا ارتىنان قىزىمدى جەتەلەپ مەن دە ورالدىم قازاقستانعا.

2010 جىلى 7 مامىرداعى گلۋبوكوە اۋداندىق سوتتىڭ شەشىمىمەن كۇيەۋىمنىڭ قىلمىستىق ءىسى توقتاتىلدى. 2011 جىلى 17 قاراشادا ەكەۋمىز «ورالمان» رەتىندە تۇراقتى تىركەۋگە تۇرىپ، قازاقستان رەسپۋبليكااسىنىڭ ازاماتتىعىن الدىق. وسى جىلى ەكىنشى ۇلىم بيقان ەلارىس قاناتۇلى دۇنيەگە كەلدى.  

باسىمىز تۇگەندەلىپ، باۋىرىمىز بۇتىندەلىپ، كوڭىلىمىز ەندى ورنىعا باستاپ ەدى، كۇتپەگەن جەردەن گلۋبوكوە اۋداندىق كوشى-قون پوليتسياسىنىڭ قىزمەتكەرلەرى «اكەڭنىڭ اتى قاتە جازىلعان!» دەگەن سىلتاۋمەن كۇيەۋىم بيحان قاناتتىڭ قازاقستان تاراپىنان بەرىلگەن تولقۇجاتىن تارتىپ الىپ، «بۇرىن شەگارا بۇزعان» دەگەن جەلەۋمەن ەسكى قىتاي تولقۇجاتىنا ون كۇندىك شىعۋ ۆيزاسىن بەرىپ، باقىتبەك تولەۋحانۇلى ەسىمدى ميلتسيا جىگىت 2011 جەلتوقسان ايىندا قىتاي شەگارا بەكەتىنەن ارى وتكىزىپ جىبەردى.

ءبىز شۋلاپ بۇل جاقتا قالا بەردىك. مىنە، سودان بەرى جەتى جىلعا تايادى. كۇيەۋىم قىتايعا وتكەن سوڭ، بۇرىنعى قاشىپ كەتكەن قىلمىسى قايتا قوزعالىپ، 6 جىلعا سوتتالىپ، وتكەن جىلى تۇرمەدەن بوساپ شىقتى. جاقىندا ءبىر ايلىق «ساياسي ۇيرەنۋ» كۋرسىن دا تامامدادى. قازىر شىڭجاڭنىڭ قابا اۋدانىندا تۇرىپ جاتىر.

كەيىن انىقتاپ بىلدىك، ونىڭ اكەسىنىڭ اتى قاتە جازىلماعان. نە سەبەپتى قىتايعا شىعارىپ جىبەرگەنىن بىلمەيمىز. تۇرمەدەن شىققان سوڭ بىزگە حابارلاستى. قىتايدىڭ قۇزىرلى ورىندارى قازاقستان رەسپۋبليكاسىنىڭ ازاماتى ەكەنىڭدى دالەلدەپ، تولقۇجاتىڭدى اكەلسەڭ، قازاقستانعا شىعۋعا رۇقسات ەتەمىز دەپتى.

كۇيەۋىم بيحان قاناتتىڭ قازاقستان رەسپۋبليكاسىنىڭ ازاماتى ەكەنىندە داۋ جوق. قولىمىزدا ازاماتتىققا قابىلدانعانى تۋرالى شەشىم مەن جەكە باسىن كۋالاندىراتىن كۋالىگىنىڭ كوشىرمەسى بار.

قۇرمەتتى اعالار!

سىزدەردەن ءوتىنىش، كۇيەۋىم بيحان قاناتتىڭ قازاقستان ازاماتى ەكەنىن انىقتاپ، تولقۇجاتى مەن كۋالىگىن وزىنە بەرىپ، وتانى قازاقستانعا، مۇنداعى وتباسىنا قايتا ورالۋىنا كومەكتەسىڭىزدەرشى!

قۇرمەتپەن،

ءانيپا ساتىبالدى

Abai.kz