قىتاي بيلىگىنىڭ ەتنيكالىق از ۇلتتارعا جاساپ جاتقان ساياسي سۇرگىنى جايلى ءبىز تۇگىلى الەمدىك باق دابىل قاعۋدا. ەۋروپارلامەنت پەن حالىقارالىق ادام قۇقىقتارىن قورعاۋ ۇيىمدارى شىڭجاڭداعى شىرعالاڭعا اراشا ءتۇسىپ جاتىر.

قازاقستاننىڭ سىرتقى ىستەر مينيسترلىگى دە قول قۋسىرىپ وتىر دەي المايمىز. قىتايدىڭ ساياسي وقىتۋ لاگەرلەرى مەن تۇرمەلەرىنە ناقاق قامالعان 12 قازاقستاندىقتىڭ توعىزى بوساپ شىققانىن وتكەن اپتادا مينيستر قايرات ءابدراحمانوۆتىڭ ءوزى حابارلاعان ەدى.

دەسە دە، تۋىستارى ءام وتباسى مۇشەلەرى قىتايدا ساياسي تۇرمەگە تۇسكەن جانە حابارسىز كەتكەن قازاقستاندىقتار ەل بيلىگىنەن اراشا سۇراپ، بەينەۇندەۋ جولداۋدا.

وسىنداي بەينەۇندەۋدىڭ ءبىرىن بەلگىلى جۋرناليست ساۋلە ابىلداحانقىزى ءوزىنىڭ «Facebook» جەلىسىندەگى جەكە پاراقشاسىندا ءبولىسىپتى.

وندا قىتايدىڭ ساياسي تۇرمەسىنە تۇسكەن اقىن، جازۋشى ەرتاي سۇلتانبەكۇلىنىڭ تۋىستارى قازاقستان پرەزيدەنتى ن. نازارباەۆتان، ءسىم-نەن، حالىقارالىق ادام قۇقىعىن قورعاۋ ۇيىمدارىنان جانە قوعامدىق بەلسەندى توپ وكىلدەرىنەن كومەك سۇراعان.

بىزگە بەلگىلى اقپارات بويىنشا، ەرتاي سۇلتانبەكۇلى 2018 جىلى 25 ماۋسىمدا قىتايداعى ساياسي تۇرمەگە تۇسكەن.

قحر، قۇلجا قالاسى، شاپشال اۋدانىندا 1967 جىلى تۋعان. جوعارى ءبىلىمدى. اقىن. ۇستاز.

2004 جىلى «نۇر-اعانىڭ مونولوگى» اتتى پوەماسى ءۇشىن ەلباسىنىڭ قولىنان ارنايى ماراپات العان. اقىننىڭ باۋىرلارى اتقامىنەلەردەن كومەك سۇراپ، بەينەۇندەۋ جولدادى.

«ءبىز قازاقستان رەسپۋبليكاسىنىڭ ازاماتتارى جەڭىسبەك سۇلتانبەكۇلى، نۇرگۇل سۇلتانبەكقىزى، باۋىرىمىز ەلتاي سۇلتانبەكۇلىنىڭ 2018 جىلدىڭ 25-ماۋسىمىندا قىتايدىڭ ساياسي وقىتۋ لاگەرىنە تۇسكەنىن بىلدىك. جالىنايىن سىزدەرگە، وسى اعاما اراشا ءتۇسىپ، كومەكتەسۋلەرىڭىزدى سۇرايمىن»، - دەپ جىلاپ جىبەردى نۇرگۇل سۇلتانبەكقىزى.

نۇرزات توعجان

Abai.kz