پارلامەنت سەناتى حالىقارالىق قاتىناستار، قورعانىس جانە قاۋىپسىزدىك كوميتەتى مۇشەلەرىنىڭ وزبەكستان ولي ءماجىلىسىنىڭ سەناتى حالىقارالىق قاتىناستار، سىرتقى ەكونوميكالىق بايلانىستار، شەتەل ينۆەستيتسيالارى جانە تۋريزم جونىندەگى كوميتەتىنىڭ دەپۋتاتتارىمەن سارىاعاشتاعى كەزدەسۋىنىڭ قورىتىندىلارى بويىنشا ازىرلەنگەن ناقتى ۇسىنىستار ۇكىمەتكە جىبەرىلەتىن بولدى. بۇل تۋرالى سەنات كوميتەتىنىڭ توراعاسى داريعا نازارباەۆا جۋرناليستەرگە بەرگەن سۇحباتىندا اتاپ ءوتتى، دەپ جازادى سەناتتىڭ ءباسپاسوز قىزمەتى.

قازاقستان مەن وزبەكستان سەناتورلارى كەدەندىك رەتتەۋدى جەتىلدىرۋ، تاۋار اينالىمىن ارتتىرۋ جانە تۋريزم سالاسىنداعى ىنتىماقتاستىقتى ۇلعايتۋ تۋرالى ۇسىنىستار ايتتى.

«اشىق ءارى ايقىن جانە دوستىق شەكاراسىن قالىپتاستىرۋ كەرەك، سوندا بارلىق سالالارداعى قارىم-قاتىناستار تەرەڭدەي تۇسەدى»، - دەدى د.نازارباەۆا. ول ءۇشىن بارلىق كەدەندىك راسىمدەردى بىرىڭعايلاۋ كەرەك. اقپاراتتاندىرۋ سالالارى ىسكە قوسىلماي، جەدەل دامۋ مۇمكىن ەمەس. قازىرگى اقپاراتتىق جۇيەلەر بولمايىنشا شەكارادا باقىلاۋ جۇزەگە اسپايدى.

سەناتورلار ەكى ەلدىڭ تۋريستىك الەۋەتىن دامىتۋ ماسەلەسىن دە قارادى. قازاقستان مەن وزبەكستاندا ءتۋريزمدى دامىتۋ عانا ەمەس، ورتالىق ازيانىڭ بارلىق كورنەكتى جەرلەرىن كورگىسى كەلەتىن شەتەل تۋريستەرىنىڭ ءبىزدىڭ ەلدەرگە كەلۋىن ىنتالاندىرۋ دا ماڭىزدى، دەپ سانايدى د.نازارباەۆا. ول ازيالىق «Silk viza» شەنگەنىن قالىپتاستىرۋ تۋرالى ۇسىنىس ايتتى.

پارلامەنتشىلەر بارلىق ماسەلەلەردى كەزەڭ-كەزەڭمەن شەشۋ ءۇشىن بىرلەسكەن جول كارتاسىن ازىرلەۋگە ۋاعدالاستى. سەنات كوميتەتتەرىنىڭ دەڭگەيىندە ءوزارا ءىس-قيمىلدىڭ وسىنداي سيپاتى جالعاساتىن بولادى.

وزبەكستان ولي ءماجىلىسى سەناتىنىڭ حالىقارالىق قاتىناستار، سىرتقى ەكونوميكالىق بايلانىستار، شەتەل ينۆەستيتسيالارى جانە تۋريزم كوميتەتىنىڭ توراعاسى الىشەر قۇرمانوۆ وزبەكستان مەن قازاقستان اراسىندا شەشىلمەگەن ماسەلەلەردىڭ جوق ەكەنىن اتاپ ءوتتى. «بۇل حالىقتارىمىزدى جاقىنداتۋدى كوزدەيتىن ءبىزدىڭ پرەزيدەنتتەرىمىزدىڭ نيەتتەرىن پارلامەنتشىلەر دە، مينيسترلىكتەر مەن مەكەمەلەردىڭ وكىلدەرى دە تولىعىمەن قولدايتىنىن كورسەتەدى»، - دەدى ول.

شاراعا قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ، ىشكى ىستەر مينيسترلىگى كوشى-قون قىزمەتى كوميتەتىنىڭ، اۋىل شارۋاشىلىعى، قورعانىس جانە اەروعارىشتىق ونەركاسىبى، مادەنيەت جانە سپورت مينيسترلىكتەرىنىڭ وكىلدەرى قاتىستى.

Abai.kz