قازاقستان پارلامەنتى سەناتىنىڭ توراعاسى قاسىم-جومارت توقاەۆ وزبەكستان ەلشىسى س. نيازحودجاەۆتى لاۋازىمعا كىرىسۋىمەن قۇتتىقتادى جانە ءبىزدىڭ مەملەكەتتەرىمىزدىڭ اراسىنداعى ءداستۇرلى دوستىق قاتىناستاردىڭ يگىلىگى جولىنداعى جۇمىسىندا تابىستى بولۋىنا تىلەكتەستىگىن ءبىلدىردى.

سەنات توراعاسى وبەكستاندى قازاقستاننىڭ ايماقتاعى نەگىزگى ساياسي جانە ەكونوميكالىق ارىپتەسى رەتىندە اتادى. «سوڭعى كەزدە ءبىزدىڭ ەلدەرىمىز اراسىنداعى ءتۇرلى سالاداعى ىنتىماقتاستىقتىڭ دامۋى قارقىن الا تۇسكەنىن ريزاشىلىقپەن كورىپ وتىرمىز. ىنتىماقتاستىقتىڭ بۇلايشا ءوربۋى قازاقستان مەن وزبەكستان حالىقتارىنىڭ ىنتا-ىقىلاسىنا تولىقتاي سايكەس بولىپ وتىر»، - دەدى ق.توقاەۆ.

سەنات توراعاسىنىڭ پىكىرىنشە، ءبىزدىڭ مەملەكەتتەرىمىزدىڭ باسشىلارى اراسىنداعى سەنىمدى قارىم-قاتىناس پەن ءوزارا تۇسىنىستىك ەكىجاقتى ستراتەگيالىق ىنتىماقتاستىقتى نىعايتۋدى ايقىندايتىن ماسەلە بولىپ تابىلادى.

جۇزدەسۋشىلەر ەكى ەلدىڭ زاڭ شىعارۋ ورگاندارىنىڭ ءوزارا بەلسەندى ءىس-قيمىلى ىنتىماقتاستىقتىڭ ماڭىزدى بولىگى ەكەنىن اتاپ ءوتتى. ق.توقاەۆ وزبەكستاننىڭ ولي ءماجىلىسى سەناتىنىڭ توراعاسىن قازاقستانعا ساپارمەن كەلۋگە شاقىردى.

ق.توقاەۆ پەن بەلارۋس ەلشىسى ا. نيچكاسوۆپەن كەزدەسۋىندە پارلامەنتارالىق ۇنقاتىسۋدى نىعايتۋ ماسەلەلەرى باستى نازاردا بولدى.

پارلامەنت جوعارعى پالاتاسىنىڭ باسشىسى قازاقستان مەن بەلارۋس زاڭ شىعارۋشىلارىنىڭ ەكىجاقتى سيپاتتاعى جانە تمد، ۇقشۇ جانە ەقىۇ پارلامەنتتىك اسسامبلەيالارى اياسىنداعى ءوزارا ءىس-قيمىل دەڭگەيىن جوعارى باعالادى. ق.توقاەۆ ىنتىماقتاسۋ بىرلەستىكتەرىنىڭ اياسىنداعى ەكى مەملەكەتتى جاقىنداستىرۋدا دەپۋتاتتار قىزمەتىنىڭ ماڭىزى وتە زور دەپ سانايدى.

كەزدەسۋگە قاتىسۋشىلار پارلامەنتتىك بايلانىستاردى ودان ءارى دامىتۋ، سونداي-اق ساۋدا-ەكونوميكالىق، كولىك-لوگيستيكا، گۋمانيتارلىق سالالارداعى ىنتىماقتاستىقتىڭ كەلەشەگىن قاراستىردى.

Abai.kz