الماتى وبلىسىنداعى ىلە الاتاۋى سۇلۋ تابيعاتىنىڭ اياسىندا مەدەۋدەن باستاپ شىمبۇلاق - تاباعان - اقبۇلاق جولىمەن جاياۋ 8 شاقىرىم ءجۇرىپ وتتىك. 70 شاقتى ادامنان تۇراتىن توپ، ىشىندە جۋرناليستەر، قوعام قايراتكەرلەرى، تانىمال سپورتشىلار مەن ارتىستەر، بيزنەسمەندەر مەن مەملەكەتتىك قىزمەتكەرلەر - ءبارى دە جاياۋ ءجۇرۋدى جاقسى كورەتىندەر، ولارعا تاۋداعى سوقپاق قيىنعا تۇسكەن جوق. VeloFriends قورى ۇيىمداستىرعان مارشرۋتپەن سەرگەك ءجۇرىپ ءوتىپ، عانيبەت الدىق.

توپقا جينالعان ادامدارمەن جول بويى اڭگىمەلەسىپ، پىكىر بولىستىك. جاياۋ جۇرەتىن سوقپاقتاردىڭ جاعدايىن، ەكوتۋريزمدى دامىتۋ ءۇشىن قاجەت شارالاردى تالقىلادىق، ونىڭ الەمدەگى دامۋ دەڭگەيىنىڭ جوعارى ەكەنىن جانە بەلسەندى تۇردە ناسيحاتتالاتىنىن تىلگە تيەك ەتتىك. سەبەبى، ەكوتۋريزم ەكونوميكاعا مۋلتيپليكاتيۆتى اسەر بەرەدى. قارجىلاي تۇسىمدەر ەكونوميكالىق ناتيجەمەن قاتار ەكولوگيانى ساقتاۋ جانە قورعاۋعا جۇمسالىپ، وتە تابىستى سيمبيوز بولادى.

مارشرۋت بويىندا بايقاعانىمىز: جول سىلتەيتىن بەلگىلەردىڭ، ورىندىقتاردىڭ جوعى، جولعا شىققاندار اداسىپ كەتپەۋىنە، شارشاسا دەمالۋىنا جاعداي جاسالۋى قاجەت.

مەنىڭ جەكە پىكىرىم: قازىرگى تاڭدا تاۋدا جاڭا دەمالىس جانە قوناق ۇيلەرىن سالۋدىڭ قاجەتى جوق، ونىڭ ورنىنا جاڭا جولدار سالىپ، بۇرىننان بارلارىن بايلانىستىرۋ كەرەك. مىسالى، تالعار اۋدانىندا شىمبۇلاق پەن اقبۇلاقتى اسپالى جولمەن بايلانىستىرسا، تاماشا بولار ەدى. ەلەستەتىپ كورىڭىزدەرشى، دوستارىم. قىسى-جازى جۇمىس ىستەيتىن تاۋ شاڭعىسى كۋرورتتار جەلىسى مەن جاياۋ تۋريستەرگە ارنالعان ىڭعايلى جانە قاۋىپسىز مارشرۋتتار اشىلىپ، كوپشىلىككە كەڭىنەن تاراپ، ءتىپتى سپورتتان الىس ادامدار دا سەرۋەندەۋدەن قاشپاس ەدى.

ارىستانبەك مۇحامەديۇلى 

فەيسبۋك پاراقشاسىنداعى جازباسى

Abai.kz