تاجىكستان شەكارا كۇزەتى قىرعىزدىڭ باتكەن وبلىسى لەيلەك اۋدانى سادا اۋىلىندا كەيبىر تۇرعىنداردىڭ قۇجاتتارىن تەكسەرە باستاعان. قىرعىزستاندىقتار بۇعان نارازى بولعان.

"داۋ شىعىپ، قىرعىزستان تۇرعىندارى تاجىكستاندىق شەكاراشىلار مىنگەن اۆتوكولىكتىڭ كىلتىن تارتىپ العان، شاعىن جانجال بولعان", - دەلىنگەن قىرعىزستان شەكارا قىزمەتى تاراتقان رەليزدە. مەكەمە مالىمەتى بويىنشا، "وقيعا ورنىنا تەز ارادا قىرعىزستان شەكارا جاساعى مەن قۇقىققورعاۋ قىزمەتكەرلەرى جەتتى، جانجال باسىلدى".

كەيىن قىرعىزستان مەن تاجىكستان شەكارا قىزمەتتەرىنىڭ وكىلدەرى كەزدەسىپ، تاجىكتەر جاعدايدى تۇسىندىرگەن: "شەكارا جاساعى جاس ساربازداردان قۇرىلعان، ولار بۇل جەردى بىلمەگەندىكتەن قاتەلەسىپ قىرعىزستان اۋماعىنا كىرىپ كەتكەن". "تاجىك قىزمەتكەرلەرى قىرعىز ارىپتەستەرىنەن بولعان وقيعا ءۇشىن كەشىرىم سۇرادى", - دەلىنگەن قىرعىزستان شەكارا قىزمەتىنىڭ حابارلاماسىندا.

قازىرگى تاڭدا بولعان وقيعانى تەكسەرۋ ءجۇرىپ جاتىر، ال تاجىك جاۋىنگەرلەرى مىنگەن اۆتوكولىكتى لەيلەك اۋدانى قۇقىققورعاۋ ورگاندارى قىزمەتكەرلەرى تەكسەرۋگە اكەتتى. قىرعىزستان شەكاراشىلارى قىرعىز-تاجىك مەملەكەتتىك شەكاراسىنىڭ بۇل ۋچاسكەسىندەگى جاعدايدى باقىلاۋدا ۇستاپ وتىر.

Abai.kz