اقپارات اگەنتتىكتەردىڭ حابارلاۋىنشا، ەرتاەۆتى پوليتسيا مەن روسگۆارديا وكىلدەرى ۇستاعان. ينتەرنەتتە تاراعان ۆيدەودا ەرتاەۆ مىنگەن Gelandwagen كولىگىن جول ورتاسىندا بىرنەشە پوليتسيا كولىگى قورشاپ تۇرعانىن كورۋگە بولادى. ربك اقپارات اگەنتتىگى ەرتاەۆتىڭ پوليتسيا بولىمىنە جەتكىزىلگەنىن جازدى.
2015 جىلى "اليانس بانكتىڭ" بۇرىنعى باسقارما توراعاسى جومارت ەرتاەۆ قارجى جىمقىردى دەگەن كۇدىككە ىلىنگەن.
قازاقستان باس پروكۋراتۋراسىنىڭ دەرەگىنشە، جومارت ەرتاەۆ "اليانس بانكتەگى" لاۋازىمدى تۇلعالارعا قاتىستى ىستە" كۇدىكتى رەتىندە تانىلعان. پروكۋراتۋرا "ەرتاەۆ وزگەنىڭ سەنىپ تاپسىرعان اسا قوماقتى مۇلكىن ءبىر توپ اداممەن بىرىگىپ، قىزمەت بابىن پايدالانا وتىرىپ يەمدەندى جانە جۇمسادى" دەپ ايىپتاعان.
"اليانس بانكتى" 2002-2007 جىلدارى باسقارعان جومارت ەرتاەۆ بۇعان دەيىن دە جاۋاپقا تارتىلعان ەدى. 2009 جىلى قارجى پوليتسياسى بانك اكتسيونەرلەرى مەن مەنەدجەرلەرىنە زاڭ بۇزدى دەپ ايىپ تاققان كەزدە جومارت ەرتاەۆ توعىز اي قاماۋدا وتىرىپ بوساپ شىققان. كەيىن 1 ميلليارد دوللار قارجى جىمقىرۋعا بايلانىستى بۇل ءىس "بۋحگالتەرلىك جانە قارجىلىق ەسەپ زاڭناماسىن بۇزۋ" جانە "بانكتىڭ قارجىسىن زاڭسىز جۇمساۋ" دەگەن باپتارعا اۋىستىرىلعان. ول كەزدە سوتقا تارتىلعان ادامداردىڭ اراسىندا بانكتىڭ ديرەكتورلار كەڭەسىنىڭ توراعاسى مارعۇلان سەيسەنباەۆ تا بولعان.
"اليانس بانك" قازاقستاندا قارجىلىق داعدارىس بولعان 2009 جىلى دەفولت جاريالاپ، كەيىن رەسترۋكتۋريزاتسيالانعان. 2015 جىلى بانك قايتا قۇرىلىپ، ونىڭ قۇرامىنا "تەمىربانك" پەن ForteBank قوسىلعان. 2015 جىلى اقپاندا "اليانس بانكتىڭ" اتاۋى ForteBank بولىپ وزگەرگەنى حابارلانعان.
Abai.kz اقپاراتتىق پورتالىندا جاريالانعان ماقالاعا پىكىر ايتىپ، ويىڭىزدى بىلدىرگىڭىز كەلسە،مىنا پاراقشاعا جازىپ قالدىرىڭىز!
Abai.kz
