جەكسەنبى, 14 ءساۋىر 2024
4494 5 پىكىر 4 مامىر, 2018 ساعات 14:54

اقبەرەن ەلگەزەك جاستار كەڭەسىنىڭ توراعاسى بولىپ تاعايىندالدى

قازاقستان رەسپۋبليكاسى مادەنيەت جانە سپورت ءمينيسترى، جاستار كەڭەسىنىڭ توراعاسى ارىستانبەك مۇحامەديۇلىنىڭ 2 مامىرداعى بۇيرىعىمەن جاستار كەڭەسىنىڭ توراعاسى اقبەرەن ەلگەزەك، ال كەڭەستىڭ حاتشىسى بولىپ قازاقستان جازۋشىلار وداعىنىڭ استانا قالالىق فيليالى ديرەكتورى باۋىرجان قاراعىزۇلى بەكىتىلدى.

ەستەرىڭىزگە سالا كەتسەك، ۇلتتىق ادەبيەتىمىزدى جانە اقىندىق ونەردى قولداۋ مەن ناسيحاتتاۋ ماقساتىندا قازاقستان رەسپۋبليكاسى مادەنيەت جانە سپورت مينيسترلىگى جانىنان جاستار كەڭەسى قۇرىلعان بولاتىن.

جاڭا جاساقتالعان كەڭەس – ونەر جانە ادەبيەت سالاسىندا ادىستەمەلىك-ساراپتامالىق جۇمىستى جۇزەگە اسىرۋ ءۇشىن قۇرىلعان كونسۋلتاتيۆتىك-كەڭەستىك ۇيىم.

سونىمەن جاستار كەڭەسى نە ىستەيدى؟ ونىڭ قۇزىرەتى قانداي؟

مينيسترلىكتىڭ ءباسپاسوز قىزمەتىنەن حابارلاعانداي، كەڭەستىڭ نەگىزگى مىندەتتەرى - جاستارعا قاتىستى كەشەندى ادەبيەت جانە ونەر سالالارىنىڭ باسىم باعىتتارىن انىقتاۋ، ونى قالىپتاستىرۋ جانە ىسكە اسىرۋ، جەكە جانە زاڭدى تۇلعالارمەن، شىعارماشىلىق وداقتار، قاۋىمداستىقتار جانە تاعى باسقا قوعامدىق ماڭىزى ۇيىمدارمەن بىرلەسە وتىرىپ جۇمىس جۇرگىزۋ بولىپ وتىر. سونداي-اق، جاستار كەڭەسى جاستاردىڭ ءتۇرلى زاماناۋي فورۋمدارعا، كونفەرەنتسيالارعا، جيىندارعا قاتىسىپ، مينيسترلىكتىڭ شەشىمدەرىن تالقىلاۋ مەن قابىلداۋ كەزىندە جۇرتشىلىقتىڭ پىكىرىن ەسكەرە وتىرىپ جۇمىس جۇرگىزەدى، مەملەكەتتىك جانە ۇكىمەتتىك باعدارلامالاردىڭ جوبالارىن جانە تاعى باسقا دا جاستارعا قاتىستى وزگە دە ماڭىزدى سۇراقتارىن تالقىلاپ، شىعارماشىلىق قايراتكەرلەرمەن جۇمىس بارىسىندا تۋىنداعان ماسەلەلەردى شەشۋدە ورتالىق جانە جەرگىلىكتى اتقارۋشى ورگاندارعا كونسۋلتاتيۆتىك كومەك كورسەتەدى.

جاس اقىن-جازۋشىلار كەڭەسىنىڭ قۇرامىنا ماقسات مالىك، ميراس مۇقاش، ميراس اسان، ايبول يسلامعالي، قانات ابىلقايىر، باقىتگۇل باباش، دارحان بەيسەنبەك، ەرلان ءجۇنىس، باۋىرجان قاراعىزۇلى، قالقامان سارين، بەيبىت سارىباي جانە تاعى ءبىرشاما ەلىمىزگە بەلگىلى جاس جانە ورتا بۋىننىڭ تانىمال اقىن-جازۋشىلارى ەنىپ وتىر.

 

Abai.kz

 

 

5 پىكىر