مەملەكەت باسشىسى جوعارى اسكەري جانە ارناۋلى اتاقتار مەن مەملەكەتتىك ناگرادالار تاپسىرۋ راسىمىنە قاتىستى، دەپ حابارلايدى اقوردانىڭ ءباسپاسوز قىزمەتى.

راسىمگە قاتىسۋشىلارعا ارنالعان سوزىندە ەلباسى قازاقستاندا وتان قورعاۋشى كۇنى مەن جەڭىس كۇنىن مەرەكەلەۋدىڭ ماڭىزدىلىعىن ەرەكشە اتاپ ءوتتى.

– مەن بۇگىن جوعارعى باس قولباسشى رەتىندە جوعارى اسكەري جانە ارناۋلى اتاقتار، سونداي-اق قىزمەتتەگى جەتىستىكتەرى ءۇشىن مەملەكەتتىك ناگرادالار تاپسىرامىن. وسىنداي جوعارى ماراپاتقا ەلىمىزدىڭ بەيبىت ءومىرى مەن تىنىشتىعىن ساقتايتىن اسكەرىمىز بەن ارناۋلى قىزمەتتەردىڭ ۇزدىك وكىلدەرى يە بولىپ وتىر، – دەدى قازاقستان پرەزيدەنتى.

نۇرسۇلتان نازارباەۆ الەمدە بەلەڭ الىپ كەلە جاتقان تۇراقسىزدىق جاعدايىندا مەملەكەتتىڭ اسكەري-كۇش سالاسى ەرەكشە ماڭىزعا يە بولاتىنىن ايتتى.

– ءبىزدىڭ اسكەرىمىز بەن قۇقىق قورعاۋ قۇرىلىمدارىمىز ەل قاۋىپسىزدىگىنىڭ بەرىك قالقانى ءارى ەگەمەندىگىمىزدىڭ مىزعىماس كەپىلى بولىپ سانالادى. مەملەكەت بارشا قازاقستاندىقتاردىڭ بەيبىت ءومىرى مەن تىنىشتىعىن ساقتاۋ جولىنداعى سىزدەردىڭ ەرلىكتەرىڭىز بەن قاجىرلى ەڭبەكتەرىڭىزدى جوعارى باعالايدى، – دەدى مەملەكەت باسشىسى.

قازاقستان پرەزيدەنتى ەلىمىزدىڭ قاۋىپسىزدىگىن قامتاماسىز ەتۋ جانە وسكەلەڭ ۇرپاقتى تاربيەلەۋ ىسىندە ءاربىر اسكەري قىزمەتشىنىڭ زور ءرول اتقاراتىنىن اتاپ ءوتتى.

– جاۋىنگەرلەر ءاردايىم وتان ءۇشىن وتقا ءتۇسۋدى پارىز ساناعان. بۇل – ءجاي ءسوز ەمەس. ءبىز مۇنى ۇلى وتان سوعىسى تاريحىنداعى ەرلىك ىستەردەن جانە اتا-بابامىزدان قالعان مۇرالاردان بىلەمىز. ارقاشان وسىلاي بولعان جانە بولا بەرەدى. ەلىمىز ءوز ارمياسى مەن قۇقىق قورعاۋ ورگاندارىن باعالاپ، قۇرمەت تۇتادى، سونداي-اق سىزدەردى ادال ءارى قالتقىسىز قىزمەت ەتەدى دەپ سەنەدى، – دەدى نۇرسۇلتان نازارباەۆ.

سوڭىندا مەملەكەت باسشىسى سالتاناتتى شاراعا قاتىسۋشىلاردىڭ بارلىعىن وتان قورعاۋشى كۇنىمەن جانە ۇلى جەڭىس مەرەكەسىمەن قۇتتىقتادى.

ءراسىم بارىسىندا ءىى دارەجەلى «داڭق» وردەنىمەن – م.تالاسوۆ، م.قۇسايىنوۆ، م.ساتوۆ، ق.جاقىپباەۆ، ءى دارەجەلى «ايبىن» وردەنىمەن – د.كۇرماشەۆ، ا.تولەۋوۆ، II دارەجەلى «ايبىن» وردەنىمەن – ج.جاقىپوۆ، ا.كالينين، د.پلاستوۆەتس، «قۇرمەت» وردەنىمەن – ە.وماروۆا، «ەرلىگى ءۇشىن» مەدالىمەن – ع.الەۋحانوۆ، ۆ.كالمىكوۆ، «جاۋىنگەرلىك ەرلىگى ءۇشىن» مەدالىمەن – ن.زالمۇقانوۆ ماراپاتتالدى.

جوعارى ارناۋلى اسكەري اتاقتار مەن سىنىپتىق شەندەرگە يە بولعاندار ءتىزىمىن مىنا جەردەن كورۋگە بولادى.

Abai.kz