16 ءساۋىر كۇنى الماتى وبلىسىندا 2017-2021 جىلدارعا ارنالعان ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا «باستاۋ» جوباسى بويىنشا وقىتۋ باستالدى. ودان بۇرىن 14-15 ءساۋىر كۇندەرى ۇمىتكەرلەر ءۇشىن تەستىلەۋ ۇيىمداستىرىلدى. ەمتيحان قورىتىندىسى بويىنشا 864 اۋىل ازاماتى وقۋعا قابىلداندى.

قازىرگى تاڭدا «باستاۋ» جوباسى بويىنشا كاسىپكەرلىك نەگىزدەرى بويىنشا ءبىلىم بەرۋ 16 اۋدان ورتالىعىندا جۇرگىزىلۋدە.

««باستاۋ» جوباسىنىڭ ءبىرىنشى اعىمىندا 800-دەن استام ادام بار. اۋدانداردا ءبىزدىڭ بيزنەس-ترەنەرلەر العاشقى ساباقتارىن باستاپ كەتتى. تالدىقورعان، تەكەلى، قاپشاعاي قالالارىندا وقىتۋ شىلدە ايىندا جوسپارلانعان»، -  دەپ اتاپ ءوتتى الماتى وبلىسى كاسىپكەرلەر پالاتاسى كاسىپكەرلىككە قارجىلىق ەمەس قولداۋ كورسەتۋ ءبولىمىنىڭ باسشىسى ەرلان داتقاەۆ.

جالپى بيىل وڭىردە وقىتۋمەن 3,3 مىڭنان ادامدى قامتۋ جوسپارلانىپ وتىر.

«باستاۋعا» جۇمىسسىزدار مەن ءوزىن-ءوزى قامتىعان ازاماتتار جانە ءىسىن كەڭەيتۋگە ماقسات قويعان جۇمىس ىستەپ جۇرگەن كاسىپكەرلەر قاتىسا الادى. قاتىسۋعا ءوتىنىم جۇمىسپەن قامتۋ ورتالىعى ارقىلى قابىلدانادى جانە ۇمىتكەرلەر تەستىلەۋدەن وتەدى. سونىڭ ناتيجەسى بويىنشا وقۋعا قابىلدانادى.

وقىتۋ باعدارلاماسى 12 مودۋلدەن تۇرادى. قاتىسۋشىلارعا سالىق رەجيمدەرى، زاڭناما، ماركەتينگ نەگىزدەرى، بيزنەس سالاسىنداعى سۇرانىستاعى باعىتتار جانە ت.ب. ءبىلىم بەرىلەدى. سونىمەن بىرگە، تاجىريبەلىك ساباقتار، كاسىپكەرلىك وبەكتىلەرىن ارالاۋ، تابىستى بيزنەس وكىلدەرىمەن كەزدەسۋ ۇيىمداستىرىلادى. ءبىر ايلىق كۋرستا وتاندىق بيزنەس-ترەنەرلەر ساباق بەرەدى. سونىمەن بىرگە قاتىسۋشىلارعا باعدارلاما بويىنشا شاكىرتاقى تولەنەدى.

ايتا كەتەيىك، «باستاۋ» بويىنشا وقىتۋعا قاتىسقان ازاماتتار 6%-پەن 18 ملن-عا دەيىن نەسيە الۋ مۇمكىندىگىنە قول جەتكىزە الادى.

Abai.kz