تاجىكستاننىڭ ءتيىستى ورگاندارى قازاقستان ۇسىنىسىن قاراپ جاتىر. بۇل ماسەلە 4 ساۋىردە پارلامەنت وتىرىسىندا كوتەرىلدى. ەلدىڭ ەنەرگەتيكا جانە سۋ رەسۋرستارى ءمينيسترىنىڭ ءبىرىنشى ورىنباسارى سۋلتون راحيمزودانىڭ ايتۋىنشا، قازاقستان بار بولعانى تاجىك تەڭىزىندەگى سۋ رەسۋرسىن ءتيىمدى پايدالانۋعا كومەكتەسكىسى كەلەدى. وزبەكستان دا ءدال وسىنداي ۇسىنىسپەن شىققان، قازىر جۇمىس توبى كەلىسىم دايىنداپ جاتىر.

"كەلىسىم تاجىكستانداعى سۋدى پايدالانۋدى قاراستىرمايدى. قازاقستان مەن وزبەكستان قايراققۇم سۋ قويماسىنا سۋدى كوبىرەك جيناۋ ءۇشىن كومەك ۇسىنىپ وتىر. بۇعان كوپ قاراجات قاجەت، تاشكەنت پەن استانا ونى بەرۋگە ءازىر", - دەدى راحيمزودا.

ونىڭ ايتۋىنشا، جىل سايىن سۋ تاسقىندارى مەن سەل بولعان ۋاقىتتا قازاقستان مەن وزبەكستان گۋمانيتارلىق كومەك كورسەتىپ كەلەدى. "بۇل كومەكتىڭ ورنىنا، اپاتتاردىڭ الدىن العان ءتيىمدى بولار ەدى", - دەدى راحيمزودا.

2008 جىلعا دەيىن تاجىكستان وزبەكستان جانە قازاقستانمەن سۋ ماسەلەسىن رەتتەۋدە تىعىز بايلانىس ورناتىپ كەلگەن. بۇل ەلدەر سىردارياداعا سۋدىڭ جينالۋىنا تەحنيكالىق جانە قارجىلاي كومەك بەرىپ وتىرعان.

Abai.kz