اللا ءناسىپ ەتكەن عيبراتقا تولى عۇمىرىن ۇرپاق تاربيەلەۋ مەن شىعارماشىلىققا ارناعان اقىن، ۇستاز ءشامشابانۋ حامزاقىزى وقۋشىلارمەن كەزدەستى.  ش.ءۋاليحانوۆ اتىنداعى №12 مامانداندىرىلعان گيمنازيا ۇيىمداستىرعان ادەبي-سازدى كەش «جۇرەگىمدە ءداۋىردىڭ ءىزى قالدى» دەگەن اتپەن ءوتتى. مەكتەپتىڭ تالانتتى وقۋشىلارى اقىنىڭ ءومىرى مەن ولەڭدەرى، وي-تولعامدارى جايىندا تۇيگەندەرىن ورتاعا سالىپ، جىرلارىن جاتقا وقىدى. كوكەيلەرىندە جۇرگەن، وزدەرىن قىزىقتىرعان كوپ ساۋالدارىن قويىپ، جاۋاپ الدى. وزگەشە فورماتتا وتكەن كەشتەن شابىت العان اقىن ءومىر جولىنداعى ونەگەلى ساتتەردى ەسكە الىپ، شابىتتانا ولەڭ وقىدى. اسىرەسە  30 جىلدان كەيىن اناسىن كورگەن كەزىن، سونداعى ايرىقشا ساعىنىشتان تۋعان ولەڭىن تولقي وتىرىپ وقىعاندا تىڭداۋشىلار ودان ارى تەبىرەنە ءتۇستى. ەلگە، وتانعا دەگەن ماحابباتىن جىرمەن جەتكىزىپ، جۇرەك سىرىن اقتاردى.

وقۋشىلاردى كىتاپ وقۋعا، ءبىلىمدى، نامىستى بولۋعا شاقىرىپ، اجەلىك اقىلىن ايتىپ، اق باتاسىن بەردى. مەكتەپ ۇجىمى قوناققا ەرەكشە قوشامەت كورسەتتى. اسەرلەنگەن وقۋشىلار قالامگەرگە تىك تۇرىپ قۇرمەت كورسەتىپ، سۋرەتكە ءتۇسىپ، قولتاڭبا الدى. اتالعان يگى شارا «زەينوللا سانىك اتىنداعى مادەنيەت قورىنىڭ» قولداۋىمەن وتكىزىلدى. قور ۇجىمى مەكتەپكە باعالى كىتاپتاردى سىيعا تارتتى. كەزدەسۋگە بەلگىلى اقىن، قر مادەنيەت قايراتكەرى سەرىك قاليەۆ، اقىن ماعزيا قۇنىپياقىزى جانە اقىننىڭ بالالارى مەن باق وكىلدەرى قاتىستى.

قىتاي مەملەكەتتىك جازۋشىلار وداعىنىڭ جانە قازاقستان جازۋشىلار وداعىنىڭ مۇشەسى ءشامشابانۋ حامزاقىزى 30 جىلعا جۋىق ۇستازدىق ەتتى. قىتايدا «جاۋقازىن»، «عاسىر تولعانىستارى»، «بالالارعا بازارلىق» كىتاپتارى  جارىق كوردى. ال قازاقستاندا «ارماننىڭ سۋىرتپاعى»، ەكى تومدىق شىعارمالار جيناعى جانە «ءسوز - كەستە» كىتابى 2017-جىلى وقىرمانعا جول تارتتى.

ازامات الاشتەگى

سۋرەتتەردى تۇسىرگەن: سارسەنبەك قىزايبەكۇلى

Abai.kz