كيەۆ پروكۋراتۋراسى بوگومولەتس اتىنداعى ۇلتتىق مەديتسينالىق ۋنيۆەرسيتەتتىڭ ستۋدەنتى بولعان تۇركىمەنستاندىق وزبەك قىزى، 19 جاستاعى مۋككاداس ناسىرلاەۆانى سۋيتسيدكە يتەرمەلەدى دەگەن ايىپپەن وقۋ ورنىنىڭ باسشىلارىنا قارسى قىلمىستىق ءىس قوزعادى.

مارقۇمنىڭ اتا-اناسىنىڭ ادۆوكاتىنىڭ سوزدەرىنشە، مۋككاداس ءوزى وقيتىن ۋنيۆەرسيتەت باسشىلارى ۋكراينادا تۇراقتى تۇرۋعا انىقتاما بەرۋدەن باس تارتقان سوڭ، كيەۆ كوپىرىنەن سەكىرىپ كەتكەن. ادۆوكات شەتەلدىك ستۋدەنتتەرمەن جۇمىس ىستەيتىن دەكانات مۋكادداستىڭ قۇجاتتارىن ميگراتسيالىق قىزمەتكە ۋاقىتىندا وتكىزبەگەن.

پروكۋراتۋرا ستۋدەنتتىڭ 30 قاڭتاردا كيەۆتەگى پاتون كوپىرىنەن سەكىرىپ ولگەنىن راستادى.

مۋكادداستىڭ تانىستارى ونىڭ جوعارى وقۋ ورنىنا 2017 جىلى تۇسكەنىن، 7-سىنىپتان باستاپ ءتىس دارىگەرى بولۋدى ارمانداعانىن ايتادى. ول ءارى اعىلشىن ءتىلى توبىندا وقىپ، توپباسى بولعان ەكەن. قۇربىلارىنىڭ ايتۋىنشا، مۋكادداس پەن شەتەلدىك ستۋدەنتتەرمەن جۇمىس ىستەيتىن دەكاننىڭ ورىنباسارى تاتيانا تيموحينا اراسىندا كەلىسپەۋشىلىك تۋىنداعان.

"مۋكادداستىڭ اتا-اناسى ۋكراينادا ۆيزا الۋدا قيىندىق بولىپ جاتقانىن ءبىلدى. ولار قىزىنا ەلگە ورالىپ، ءبىر جىل اكادەميالىق دەمالىس الىپ، وقۋىڭدى جالعاستىرارسىڭ دەپ كەڭەس بەرگەن. تۇركىمەنستاننىڭ ۋكرايناداعى ەلشىلىگى بولسا، مۋكادداستى ەلدەن شىعارماي، ماسەلەنى شەشۋدى ۇسىنعان. بىراق دەكانات ەشنارسە ىستەگىسى كەلمەدى ", – دەيدى مارقۇمنىڭ تانىسى.

ۋنيۆەرسيتەت مۋككاداس ناسىرلاەۆامەن ميگراتسيالىق پروبلەمانىڭ بولعانىن راستادى. ونىڭ ۆيزاسى بىلتىر 17 جەلتوقساندا اياقتالعان ەكەن. سول ءۇشىن ول وقۋدان شىعارىلعان.

Abai.kz