قاماۋداعى تاعى ءبىر ساياساتكەر بەكتۋر اسانوۆ №47 تۇزەۋ كولونياسىندا قالعان. ادۆوكات مارس كىدىكباەۆتىڭ پىكىرىنشە، سوتتالعانداردى ولاردىڭ تۋىستارىنىڭ نارازىلىعىنان سوڭ وقشاۋلاپ جاتىر. ساياساتكەرلەردىڭ تۋىستارى مەن جاقىندارى اشتىق اكتسياسىن جاريالاعاندارمەن كولونيادا كەزدەستىرۋىن تالاپ ەتكەن.

بەكتۋر اسانوۆ 30 قاڭتاردا اشتىق جاريالاعانىن حابارلاسا، ەرتەسىنە وعان ەرنەست كارىبەكوۆ، ال 1 اقپاندا كۋبانىچبەك كادىروۆ قوسىلدى. ساياساتكەرلەر مەملەكەتتىك ۇلتتىق قاۋىپسىزدىك كوميتەتىنىڭ باسشىسى ابديل سەگيزباەۆتى جۇمىستان شىعارىپ، ءادىل سوت وتكىزۋدى تالاپ ەتتى.

7 اقپاندا قالالىق سوت ءبىرىنشى ينستانتسيا ۇكىمىن وزگەرىسسىز قالدىردى. وتكەن جىلى 17 ساۋىردە پەرۆوماي اۋداندىق سوتى ەرنەست كارىبەكوۆتى 20 جىلعا، كۋبانىچبەك كادىروۆ پەن بەكتۋر اسانوۆتى 12 جىلعا سوتتادى. ال داستان سارىگۋلوۆ ءتورت جىل شارتتى جازا الدى.

بەكتۋر اسانوۆ پەن كۋبانىچبەك كادىروۆتى "بيلىكتى كۇشپەن باسىپ الۋعا دايىندالدى" دەپ ايىپتادى. ەرنەست كارىبەكوۆ "اسا اۋىر قىلمىستى جاسىردى" جانە "مەملەكەتتى ساتتى" دەگەن ايىپتارمەن سوتتالدى.

Abai.kz