دۋشانبەدە 31 قاڭتاردا ءباسپاسوز ءماسليحاتىن وتكىزگەن مينيستر تاجىكستان زاڭنامالارىندا "ساياسي تۇتقىن" تەرمينى جوق دەپ مالىمدەدى.

دەگەنمەن ادام قۇقىعىن قورعاۋشىلار مەن تۇتقىنداردىڭ تۋىستارى ساياسي موتيۆپەن سوتتالعان ونداعان ار-ۇجدان تۇتقىنى تەمىر توردا وتىر دەيدى. ​

Human Rights Watch ۇيىمىنىڭ ورتالى ازيا ماسەلەلەرى جونىندەگى زەرتتەۋشىسى ستيۆ سۆەردلوۆتىڭ ايتۋىنشا، زاڭدا "ساياسي تۇتقىن" تۇسىنىگى جوق بولعانىمەن، ول مۇنداي تۇتقىندار جوق دەگەندى بىلدىرمەيدى. "2015 جىلى تاجىكستان يسلام وركەندەۋ پارتياسى ەكسترەميستىك دەپ تانىلىپ، وعان تىيىم سالىنعان سوڭ، كوپتەگەن ساياسي تۇتقىن تۇرمەگە ءتۇستى", - دەدى ول وزودي راديوسىنا.

حالىقارالىق ادام قۇقىعىن قورعاۋشى ۇيىمدار "جاڭا تاجىكستان" پارتياسىنىڭ باسشىسى زايد سايدوۆتى، تاجىكستان دەموكراتيالىق پارتياسىنىڭ بۇرىنعى باسشىسى ماحمادرۋزي يسكانداروۆتى، ءتيوپ ساياسي كەڭەسىنىڭ مۇشەلەرىن ار-ۇجدان تۇتقىنى دەپ تانىدى. ولار ەكسترەميزم، كونستيتۋتسيالىق قۇرىلىمدى قۇلاتۋعا تالپىنۋ، جەمقورلىق، الاياقتىق جانە جالعان قۇجات جاساۋ ايىپتارىمەن سوتتالدى.

2015 جىلى قىركۇيەكتە گەنەرال ابدۋحاليم نازارزودانىڭ اسكەري بۇلىگى كۇشپەن باسىلىپ، يسلام وركەندەۋ پارتياسىنا تىيىم سالىنعان سوڭ، ەلدە ساياسي قۋدالاۋ كۇشەيدى. باس پروكۋرور ءبىر عانا حودجا حاليم ءىسى بويىنشا 170 ادام سوتتالعانىن حابارلاعان. ولاردىڭ اراسىندا ءتيوپ-ءتىڭ 13 مۇشەسى بار. بۇل ىستەردىڭ ساياسي استارى بار دەپ ەسەپتەلەدى. ادام قۇقىعىن قورعاۋشىلاردىڭ باياندامالارىندا تىيىم سالىنعان پارتيا مۇشەلەرىن قورعاعانى ءۇشىن قۋدالاۋعا ۇشىراعان ءۇش ادۆوكات – بۋزۋرگمەحر يوروۆ، نۋريددين ماحكاموۆ جانە ديلبار دوداردجونوۆانىڭ ەسىمدەرى اتالادى.

Abai.kz