دوستار، سىزدەرگە ءبىر جاعىمدى جاڭالىق جەتكىزگىم كەلىپ تۇر.

بۇگىن وبلىس اكىمدىگىندە قالانى اباتتاندىرۋعا قاتىستى وتكەن جيىندا دانيال احمەتوۆ وسكەمەندەگى كيروۆ (جاستار) پاركىنىڭ اتىن وزگەرتىپ، پارك ىشىندەگى سوۆەت زامانىن ەلەستەتەتىن اتريبۋتتاردان ارىلۋ كەرەكتىگىن ايتتى. جəنە مۇنى قالا əكىمى قۋات تۇماباەۆقا تاپسىردى. سوۆەتتىك اتريبۋت دەپ مەڭزەگەنى پارك ىشىندە قاسقايىپ تۇرعان كيروۆ ەسكەرتكىشى دەپ تۇسىندىك.

"ەندى پارككە كىمنىڭ اتىن بەرىپ، كىمنىڭ ەسكەرتكىشىن قويۋ كەرەك؟" دەگەن مəسەلەنىڭ شىعارى انىق. بىزدىڭشە، پارككە بيىل 100 جىلدىق مەرەيتويى اتالىپ وتىلەتىن داڭقتى باتىر، حالىق قاھارمانى، شىعىستىڭ تۋماسى قاسىم قايسەنوۆ ەسىمىن بەرىپ، قاسىم قايسەنوۆتىڭ وسكەمەندەگى ازس جانىنداعى نە ولاي ەمەس، نە بىلاي ەمەس بولىپ تۇرعان كەۋدە ءمۇسىنىن كيروۆ ەسكەرتكىشىنىڭ ورنىنا قويۋ كەرەك سەكىلدى. بۇل كوپتەگەن وسكەمەندىكتىڭ كوكەيىندە جۇرگەن مəسەلە ەكەندىگىنە ەشكىم داۋ ايتا قويماس. وسى رەتتە اقساقالدارىمىز قالالىق ونوماستيكالىق كوميسسياعا ءوز ۇسىنىستارىن جولداسا دەگەن تىلەك بار.

ازامات قاسىم

Facebook-تەگى پاراقشاسىنان