الدىمىزداعى جىلى الاشتىڭ اياۋلى اقىنى - ماعجان جۇماباەۆتىڭ تۋعانىنا 125 جىل تولادى. وسىعان وراي «اق جول» پارتياسىنىڭ پارلامەنتتىك فراكتسياسى دەپۋتاتتىق ساۋال جولداپ، رەسپۋبليكا كولەمىندە ماعجان وقۋلارىن وتكىزۋدى ۇسىنعان ەدى.

ءماجىلىس دەپۋتات بەرىك دۇيسەنبينوۆ جاريالاعان بۇل ساۋالدا «الاشتىڭ ماعىناسى ءبىر عانا ءجۇز جىلدىعىمەن شەكتەلمەيدى. ءبىرتۋار تۇلعا ماعجان اقىننىڭ اماناتىن اقتاۋىمىز ءۇشىن بيىلعى الاشتىڭ 100 جىلدىق مەرەيتويى كەلەسى جىلى ماعجان وقۋلارىمەن جالعاسىن تاپسا دەگەن ۇسىنىسىمىزدى مادەنيەت مينيسترلىگىنە جولدايمىز. ماعجان وقۋلارى الداعى جىلى بۇكىل رەسپۋبليكا اۋماعىندا وتكىزىلىپ، ال ونىڭ قورىتىندىسى ماعجان جۇماباەۆ تۋعان ولكەسى قىزىلجاردا جاسالعانى  ءجون. ال بولاشاقتا ماعجان وقۋلارى، اتاۋلى داتالاردا عانا ەمەس، جىل سايىن تۇراقتى وتكىزىلىپ تۇرسا نۇر ۇستىنە نۇر بولار ەدى» دەلىنگەن.

دەپۋتات بەرىك دۇيسەنبينوۆتىڭ بۇل ۇسىنىسى "Abai.kz" اقپاراتتىق پورتالىندا جاريا بولعان ەدى.

وندا بەرىك مىرزا قر مادەنيەت جانە سپورت ءمينيسترى ارىستانبەك مۇحاماديۇلىنىڭ اتىنا حات جولداپ، «ارىستانداي ايباتتى»، «جولبارىستاي قايراتتى»، «قىرانداي كۇشتى» جاستارعا سەنگەن ءبىرتۋار تۇلعا ماعجان سەنىمىنىڭ اماناتىن اقتاۋىمىز ءۇشىن بيىلعى الاشتىڭ 100 جىلدىق مەرەيتويى كەلەسى جىلى ماعجان وقۋلارىمەن جالعاسىن تاپسا دەگەن ۇسىنىسىن جەتكىزگەن بولاتىن.

ەندى مىنە، مادەنيەت جانە سپورت مينيسترلىگىنەن قۋانىشتى جاۋاپ كەلدى. اتالعان مينيسترلىك  «دارىن» رەسپۋبليكالىق عىلىمي-پراكتيكالىق ورتالىعىمەن بىرلەسە وتىرىپ «ماعجان وقۋلارىن» ۇيىمداستىرۋ بويىنشا جەرگىلىكتى اتقارۋشى ورگاندارمەن جۇمىس جۇرگىزىپ جاتقانىن حابارلاپتى. الاش اقىنىنىڭ وقۋلارى ونىڭ تۋعان جەرى - سولتۇستىك قازاقستان وبلىسىنان باستاۋ الماق. اقىننىڭ مەرەيتويى اياسىندا دوڭگەلەك ۇستەلدەر، شىعارماشىلىق كەشتەر، عىلىمي كونفەرەنتسيالار، كىتاپ كورمەلەرىن ۇيىمداستىرۋ دا كوزدەلگەن.

Abai.kz