جەلىدە تاراعان ۆيدەولاردىڭ بىرىندە تەلەارنا قىزمەتكەرى كانىبەك اسانكارىۋلى سوت ورىنداۋشىلارى اكەلگەن سوت ۇيعارىمىن وقىپ تۇر.

- مىنە، ءۇشىنشى ءبولىم: ءىستى قاراپ، سوت شەشىمى شىققانعا دەيىن جاۋاپكەرگە جىلجىمالى مۇلىكتى، تەلەراديوتاراتۋعا ارنالعان تەلەكوممۋنيكاتسيالىق قۇرىلعىلاردى پايدالانۋعا تىيىم سالىنسىن، - دەپ وقيدى تەلەارنا قىزمەتكەرى.

ال جۋرناليست ازيات جەكشەەۆ "جەرگىلىكتى ۋاقىتپەن 17:00 شاماسىندا وزدەرىن ميليتسيا قىزمەتكەرلەرىمىز، سوت ورىنداۋشىلارىمىز دەپ تانىستىرعان بىرنەشە ادام كەلىپ، سوت ۇيعارىمىن كورسەتتى" دەيدى.

- ولار عيماراتتى جانە كەڭسەدەگى مۇلىكتى تىزىمدەۋگە كەلگەندەرىن ايتىپ، ەفيردى توقتاتۋىمىزدى سۇرادى. ءبىز باسشىنى كۇتتىك. ول زاڭگەرمەن بىرگە كەلگەن بولۋى كەرەك. قازىر بۇل جاعدايدى انىقتاپ جاتىر. ەشقانداي قۇرىلعىنى سىرتقا شىعارتپاي جاتىر [سوت ورىنداۋشىلارى -رەد.]. ءبىزدىڭ تىلشىلەر سىرتتاعى تۇسىرىلىمدەرگە شىعا الماي قالدى، - دەيدى جۋرناليست.

نتس تەلەارناسىنىڭ عيماراتىنا بارعان ازاتتىقتىڭ قىرعىز قىزمەتىنىڭ تىلشىلەرى كەڭسەگە كىرە الماعان. جۋرناليستەردى ميليتسيا وتكىزبەگەن.

بۇل وقيعا تۋرالى قىرعىزستاننىڭ باس پروكۋراتۋراسى دا، ءىىم دە، مۇقك دا ازاتتىققا ەش اقپاراتى جوق ەكەنىن حابارلادى. جوعارعى سوت تەلەارنانى جابۋ تۋرالى سوت وكىمى قاشان، قانداي ينستانتسيادا شىققانىن انىقتاپ جاتقاندارىن ايتقان.

نتس تەلەارناسىنىڭ ۇستىنەن سوتقا شاعىم تۇسىرگەن "Grexton Capital LTD" كومپانياسىنىڭ وكىلى ەلەنا دزيميدوۆيچ جاعدايدى تومەندەگىدەي تۇسىندىرۋگە تىرىسقان.

نتس تەلەارناسى "رەسپۋبليكا" پارتياسىنىڭ جەتەكشىسى، جوگوركۋ كەنەش دەپۋتاتى ومۋربەك بابانوۆقا تيەسىلى ەكەنى بەلگىلى. تەلەارنا زاڭدى تۇردە وسوو بولىپ تىركەلگەن.

بۇعان دەيىن، بيىل قاراشانىڭ بىرىندە نتس كومپانياسىنىڭ قۇرامىنا كىرەتىن "سانجىرا" راديوسى حابار تاراتۋدى توقتاتقان. قاراشانىڭ 4-ىندە قىرعىزستاننىڭ باس پروكۋراتۋراسى "ۇلتارالىق ارازدىق قوزدىردى" دەگەن ايىپپەن بابانوۆتىڭ ۇستىنەن قىلمىستىق ءىس قوزعاعان.

Abai.kz